Beynəlxalq Avrasiya Mətbuat Fondunun prezidenti Umud Mirzəyev Avropa Parlamentinin qəbul etdiyi Qarabağda mədəni irsin dağıdılmasını pisləyən absurd qətnaməyə vətəndaş cəmiyyətinin nümayəndəsi olaraq münasibət bildirib.
Ednews-a danışan Umud Mirzəyev qeyd edib ki, qətnaməni hazırlayan şəxslər son iki nəfər istisna olmaqla sanki regiondan xəbərsizdirlər.
“Bu qətnamə olmaqdan əlavə həm də Avropa Parlamentinin ümumiyyətlə regiona münasibətini ifadə edir. Qətnamənin məzmununa baxdıqda ölkəmizə olan münasibət yumşaq desək çox məyusedicidir. Avropa Parlamenti dünyanın taleyinə təsir edə biləcək beynəlxalq qurumlardan biridir. Onun sərgilədiyi münasibətlər və qərarlar hər zaman dünya ictimaiyyətinin diqqət mərkəzində olur. Lakin hazırda onlar bu qətnaməni qəbul etməklə özlərinin iç üzünü ifşa etdilər”.
Siyasi xadim həmçinin vurğulayıb ki, Avropa Parlamenti növbəti dəfə ermənipərəst mövqeyini ortalığa qoyub. Onun sözlərinə görə, erməni maraqlarına xidmət edən bu qətnamə Azərbaycan və Avropa İttifaqı arasında münasibətlərin inkişafına yalnız mənfi təsir göstərəcək.
“Çünki Azərbaycan Avropa İttifaqına üzv olan doqquz ölkəsi ilə strateji əlaqələrə malikdir. Bununla bərabər, Azərbaycan Avropa İttifaqı ilə imzalanacaq sənəd üzərində işləri tamamlamaq üzrədir. Belə olan vəziyyətdə Avropa Parlamenti ermənilərin sifarişi əsasında, habelə onların maraqlarına xidmət edən qətnamə qəbul edir. Bu qətnamə Parlamentin nə adına, nə də onun statusuna yaraşmır”.
Umud Mirzəyev həmçinin qeyd edib ki, Azərbaycan ərazilərinin 30 illik işğalına göz yuman Avropa Parlamentinin bu hərəkəti özlərinin kimliyi haqqında ortaya çox maraqlı fikir sərgiləyir.
“Qarabağın 30 il davam edən işğalı dövründə Azərbaycanın ermənilər tərəfindən dağıdılmış mədəni irs obyektlərinə qarşı biganəlik göstərildi. Məscidlərdə saxlanılan heyvanlara, dağıdılan və məhv edilən Azərbaycan tarixi irsinə susqunluqla yanaşıb, erməniləri buna görə qınamadılar, onlara qarşı heç bir tədbir görmədilər. Çox təəssüf ki, “Qafqaz-Alban” mədəniyyətinə aid obyektlərin adının dəyişdirilərək erməniləşdirilməsi müzakirə predmeti olduğu bir halda Avropa Parlamentinin hədəfi yenə yalan üzərinə hədəfləndi”.
Sonda BAMF-ın prezidenti Azərbaycanın II Qarabağ savaşında ədaləti bərpa edərək zaman-zaman mənimsənilmiş irsinə sahib çıxdığını da vurğulayıb.
Qeyd edək ki, martın 10-da Avropa Parlamentində Azərbaycana qarşı növbəti dinləmələr aparılıb. Müzakirələrin sonunda Azərbaycana qarşı qərəzli qətnamə qəbul edilib. Həqiqətlərə əsaslanan heç bir faktı özündə əks etdirməyən qətnamədə qeyd edilir ki, guya Azərbaycan hökuməti işğaldan azad edilən ərazilərdə ermənilərin mədənə irsinə məxsus olan abidələr məhv edib.
.jpg)
.jpg)
