44 günlük Vətən Müharibəsindən sonra şəhidlərin adının əbədiləşdirilməsi ən aktual məsələlərdən birinə çevrilib. Saytımıza daxil olan müarciətlərdən biri də məhz bununla bağlıdır. Müraciət İkinci Qarabağ müharibəsi dövründə şəhid olan Azərbaycan Silahlı Qüvvələrinin kiçik çavuşu, 1988-ci il təvəllüdlü Elşən Musayev Hüseyn oğlunun həyat yoldaşı Mətanət Musayevadan gəlib. Füzuli və Cəbrayıl rayonları uğrunda şəhid olan E. Musayevin xanımı deyir ki, həyat yoldaşı ölümündən sonra 3 meddala təltif olunub. Qalıb Cəbrayıl uğrunda gedən döyüşlərdə göstərdiyi şücaətə əsasən təltif olunacaq medal.
“Qanuna əsasən 4-cü medal lazımdır ki, biz onun adını küçəyə verilməsini əldə edə bilək. Bununla bağlı aiddiyatı qurumlara müraciət etsək də, iki ilə yaxındır ki, məsələ öz həllini tapmayıb”.
Müraciətə əsasən, Ednews şəhidin hərbi xidmətdə olduğu hərbi hissənin sabiq komandiri Bayram Hüseynovla əlaqə saxlayıb. Bayram Hüseynov bildirib ki, artıq həmin hərbi hissənin komandiri vəzifəsində deyil və vəzifədə olduğu müddətdə məsələ ilə bağlı üzərinə düşən bütün işləri görüb.
“Artıq həmin vəzifədə deyiləm və bu barədə məlumat vermək səlahiyyətim yoxdur. Təkcə bunu deyə bilərəm ki, həmin hərbi hissədə çalışdığım müddətdə komandiri olduğum hərbçinin şəhid olduqdan sonra layiq olduğu bütün medalları əldə etməsi üçün lazımı yerlərə yazılı şəkildə müraciət etmişəm və üzərimə düşən vəzifəmi axıra qədər yerinə yetirmişəm”.
Məsələ ilə bağlı Müdafiə Nazirliyinin mətbuat xidmətinin rəisi Anar Eyvazlı Ednews-a açıqlamasında bildirib ki, nazirliyə gələn bütün məktublara baxılaraq cavab verilir.
“Şəhid Elşən Musayevin həyat yoldaşı Mətanət Musayeva tərəfindən daxil olan məktub artıq cavablandırılıb. Onun öhdəsinə düşür ki, məktubda qeyd olunan cavaba əsasən lazımı sənədləri nazirliyə təqdim etsin. Yanlız bu halda növbəti medalın verilməsi ilə bağlı nəsə edə bilərik.”
Şəhidin həyat yoldaşı Mətanət Musayevanın sözlərinə görə, məktubda qeyd olunub ki, həyat yoldaşının Vətən müharibəsindəki xidmətlərinin yenidən araşdırılması və tədbirlər görülməsi üçün müraciəti xidmətdə olduğu N saylı hərbi hissəyə göndərilib.
Hərbi hissənin Qərargah rəisi Məzahir Ağayev məktuba verdiyi cavabda şəhidə növbəti təltifetmə zamanı yeni medal veriləcəyini bildirib.
“Azərbaycan silahlı Qüvvələrində Azərbaycan Respublikasının orden və medalları ilə təltifetmə, fəxri adlar və mükafatların verilmə qaydaları haqqında təlimatın tələblərinə müvafiq olaraq onun (şəhidin) xidmət etdiyi hərbi hissə komandiri tərəfindən yuxarı komandanlıq qarşısında vəsatət qaldırdıqları və yuxarı qərargahda müsbət baxılmış sənədlər əsasında baxılır.
Əlavə olaraq bildirim ki, N saylı hərbi hissə komandiri tərəfindən verilən təltif olunanların siyahısında adı qeyd olunmadığı üçün şəhid hər hansı bir medalla təltif olunmayıb.
Növbəti təltif olunmalar zamanı onun təltif olunması nəzərə alınacaqdır”.
Sözügedən hərbi hissənin hazırkı komandiri, polkovnik leytenant Fəxrəddin Cavadovsa Ednewsa açıqlamasında məsələni daha ciddi tədqiq etdiyi, şəhidin növbəti medalla tətltif olunması üçün əlindən gələni əsirgəməyəcəyini bildirib.
“Bizim tərəfimizdən kiçik çavuş Elşən Musayevin Cəbrayılın azad olunması uğrunda gedən döyüşlərdə iştirakını təsdiq edən müvafiq sənədlər yuxarı komandanlığa göndərilib. Bizdən korpus rəhbərliyi şəhid və qazilərin təltifolunmaları ilə bağlı sənədi tələb etdiyi an şəhidimiz E.Musayevin də adı o siyahıda qeyd ediləcək. Hazırda şəxsi heyət üzrə müavinim də yanımdadır, onlara da bu məsələ ilə bağlı tapşırıq vermişəm. Yeni təltifolunamalarla bağlı göstəriş verildiyi an biz mütləq onun adını yenidən yazıb göndərəcəyik. Mənim də arzumdur ki, şəhidimiz ailəsinə onun layiq olduğu “Cəbrayılın azadlığı uğrunda” medalı tez bir zamanda təqdim edilsin. Ümumiyyətlə, şəhid ailələri və qazilər daim diqqətimizdədir”.
Ümid edirik ki, tez bir zamanda şəhidimizin haqqı olan medal ailəsinə təhvil verilər və onun adının əbədiləşdirilməsi üçün müvafiq işlər görülər. Çünki Elşən kimi şəhidlər hesabına bu gün Cəbrayıl (o cümlədən Qarabağ) Azərbaycandır...
Məsələni diqqətdə saxlayacağıq...
Zeynəb Nadirova
Nicat İsmayılov