Beynəlxalq Avrasiya Mətbuat Fondunun prezidenti Umud Mirzəyev ATƏT-in Polşadakı sədrliyinin Avropa Parlamentinin Azərbaycana qarşı qəbul etdiyi qərəzli qətnaməni dəstəkləyəcəkləri barədə verdiyi açıqlamaya münasibət bildirib.  

BAMF prezidentinin sözlərinə görə, ATƏT-in bu barədə verdiyi açıqlama ilə tanış olanda insanda elə təsəvvür yaranır ki, sanki bu Köçəryanın və yaxud Sarkisyanın ofisində hazırlanan bir sənəddir.

“Bu son dərəcə acınacaqlı bir haldır. Sonuncu yüzilliyin ən dəhşətli soyqırımı təkcə Xocalıda baş verməyib. Azərbaycanın həm də mədəniyyət abidələri, ekologiyası və torpaqları üzərində böyük bir vandalizm aktı törədilib. Avropa Parlamentində və eləcə ATƏT-in özündə də olan bir çox yetkililərin həm gözləri kor, həm də qulaqları kardır. Mən bunu çəkinmədən ifadə etmək istəyirəm, çünki bu insanlar elə mənim doğulub boya-başa çatdığım Füzulinin Aşağı Əbdürrəhmanlı kəndilə bağlı son 30 ildə zərrə qədər səslərini çıxarmadırlar. Bu illər ərzində bəlkə otuz min dəfə kəndimin harayını car çəkdim. Onlar bunu nə eşitdilər, nə də nəzərə aldılar.

Bəs, bu gün bizim dədə-baba torpaqlarımızda hansı erməni mədəni abidələrindən söhbət gedə bilər?”, - deyə U. Mirzəyev vurğulayıb.

Qurumun rəhbəri həmçinin qeyd edib ki, ümumiyyətlə o ərazilərdə azərbaycanlılarla müqayisədə çox az sayda erməni yaşayıb.

“Biz hər zaman o ərazilərdə olan alban tarixi abidələrini göz bəbəymiz kimi qorumuşuq. Xatırladım ki, Bakının mərkəzində olan erməni kilsəsi belə bir dini abidə kimi hər zaman qorunub saxlanılıb. Ermənilər isə əksinə alban abidələrinin üzərindəki yazıları, tarixi məlumatları pozaraq onlara mənsub olduğunu təsdiqləmək üçün saxta yazılar yerləşdirməyə çalışıblar”.

Sonda Umud Mirzəyev təəssüflə qeyd edib ki, Avropadan bu cür qərəzli mövqe bir Azərbaycan vətəndaşı kimi onu çox məyus edir.

“Belə qərəzli mövqe gördükdə insan çox məyus olur və Avropa dəyərləri adamın gözündən düşməyə başlayır. Budurmu, Avropa dəyərləri və Avropada insan haqlarının qorunması? Nə üçün onlar öz münasibətlərini birtərəfli sərgiləyirlər? Bu birbaşa irqçilikdir, dini ayrı-seçkilik və xristian təəssübkeşliyidir. Bunun başqa adı yoxdur. Belə hadisələri görəndə aşırı ifadələr işlətməkdən özümü zorla saxlayıram”, - deyə Fondun rəhbəri əlavə edib.

Xatırladaq ki, martın 10-da Avropa Parlamenti Azərbaycan əleyhinə riyakar addım ataraq "Dağlıq Qarabağda mədəni irsin məhv edilməsi haqqında” qondarma qətnamə qəbul edib. Qətnamayə görə, guya Azərbaycan Qarabağda erməni mədəni irsini inkar və məhv edir, beynəlxalq hüququn və Beynəlxalq Ədalət Məhkəməsinin son qərarlarını pozur.

Avropa Parlamentinin bu qərarına ATƏT-in Polşadakı sədrliyi də münasibət bildirib. Qurum açıqlamasında Avropa Parlamentinin qəbul etdiyi bu qətnaməni dəstəklədiyini və erməni tarixi və mədəni abidələrinin mühafizəsinin ATƏT-in Daimi Şurasının gündəliyinə daxil edildiyini bildirib. 

Qeyd edək ki, 30 illik işğal dövründə Azərbaycan dəfələrlə Avropanın müvafiq qurumlarına, o cümlədən də UNESCO-ya, müraciət edərək, həm Ermənistan, həm də işğal altında olan ərazilərdə xalqımıza məxsus milli-mənəvi irsin ermənilər tərəfindən məqsədyönlü şəkildə dağıdılması, silinməsi istiqamətində iş aparıldığını, beynəlxalq qurumdan bu özbaşınalığı araşdırmaq üçün müvafiq missiyaların göndərilməsini və Ermənistanın mənəvi terroruna son qoyulmasını tələb edib. Ancaq çox təəssüf ki, Azərbaycanın bu haqda olan çağırışları hər zaman cavabsız qalıb.