Son dövrlər Azərbaycanda xüsusilə qadınlar arasında estetik əməliyyatlara kütləvi axın var. Ölkəmizdə xanımlar daha çox burun, qaş qaldırma, dodaq böyütmə, sinə böyütmə və qalıcı üz botoksu kimi əməliyyatlara üz tuturlar.
Maraqlıdır ki, bu tendensiya təkcə qadınlar arasında deyil, kişilər üçün də vacib trendə çevrilib.
Güclü cinsə isə əsasən burun formasının dəyişdirilməsi, göz qapaqlarının və qırışların dartılması, dərialtı piylərin götürülməsi kimi proseduralar daha maraqlıdır.
Lakin bir çox insanlar son dəbə uyaraq hətta xarici görünüşü normal olduqda belə estetik əməliyyatlara müraciət edib cərrah bıçağı altına yatır. Bunun nəticəsində insanların xarici görünüşündə eyniləşmə, fərdiliyin və orijinallığın itməsi müşahidə olunur.
Estetik əməliyyat sevdası…
Məsələ ilə bağlı psixoloq Fərqanə Mehmanqızı bildirib ki, qadınlar əsasən rəqibləri üçün gözəlləşmək istəyirlər.
“Estetik əməliyyatlar etdirmiş bir xanım və psixoloq kimi deyə bilərəm ki, qadın heç bir şeyi kişilər üçün etmir. Belə desək qadınlar elə qadınlar üçün bəzənir. Rəqabət əslində qadınların öz arasındadır və kişilər ilə heç bir əlaqəsi yoxdur”, - deyə mütəxəssis qeyd edib.
(1).jpeg)
Estetik əməliyyatlar – psixoloji pozuntu, yoxsa dəb?
Bu barədə danışan psixoloq deyir ki, estetik əməliyyatlar insanlara görə dəyişir.
“İnsan var ki, onun həqiqətən əməliyyata ehtiyacı var. İnsan da var ki, bu onda psixoloji faktordur, əslində isə problem yoxdur. Hər kəs edir və onların gözəlləşdiyini görüb düşünür ki, o da bu yolla kompleksini aşa bilər. Amma bu zaman peşəkar həkimlər bunun heç də doğru olmadığını, psixoloji amil olduğunu görüb pasiyentə başa salırlar və əməliyyatdan yaxud hər hansı bir prosedurdan imtina edirlər.
İkincisi, bir əməliyyat digərinə gətirib çıxarır və əməliyyatlar alışqanlıq yaradır. Daha mükəmməlinə can atan psixoloji həssas insanlar bu durumda tora düşürlər”.
Eskpertin sözlərinə görə insanlar estetik əməliyyatlarda psixoloqa müraciət etməlidirlər. Bu onlarda istər əməliyyat öncəsi, istərsə də sonra psixoloji prosedura hazır olmaları üçün xüsusi əhəmiyyət kəsb edir.
“Estetik əməliyyatlardan sonrakı bəzi proseslər, ağrılar həyatı boyu insanları izləyir. Təbii ki, onların çoxu bu barədə məlumatsız olur. Bu isə əməliyyata getmək riskindən qorxmamağa gətirib çıxarır. Yaxşı olardı ki, hər bir plastik cərrah yanına gələn estetik əməliyyat ehtiyacı olan və olmayanı bir psixoloq rəyindən keçirib konsultasiyadan sonra əməliyyata alınardı. Çünki elə insanlar var ki, onların həqiqətən də plastik əməliyyata ehtiyacları var. Elə insanlar da var ki, heç bir problemi yoxdur, amma özünü narahat hiss edir. Həm də həkim də rahat olar ki, pasiyentin buna həqiqətən də ehtiyacı var və əməliyyata sağlam qərar verir”.
Plastik cərrahiyyədə bu necə qiymətləndirilir?..
Mövzu ilə bağlı plastik cərrah Rəşad Babayev isə bildirib ki, tibbin, elmin inkişafı nəticəsində estetik cərahiyyə əməliyyatlarda ağırlaşmaların aradan qaldırılması, zamanın qısa və ya uzun olması, risklərin minimuma endirilməsi ilk növbədə insanlarda bu əməliyyatlara qorxusunu aradan qaldırır.
“Bu gün anesteziyanın kifayət qədər zirvədə olması, anesteziyoloji dərmanların əlavə təsirinin mimimuma enməsi cərrahiyyə əməliyyatlara əks göstərişlərini azaldır. Əvvəllər əgər 1-2 saatdan uzun çəkən estetik əməliyyatlara gedilmirdisə bu gün 7-10 saat uzanan əməliyyata getmək mümkündür”.
Həkim cərrahın sözlərinə görə, əməliyyat öncəsi müayinələr zamanı pasiyentin hazırlanması çox vacibdir bir prosesdir.
“Müayinələrdə müəyyən qradiyentlər var ki, biz onları keçmirik və bununla da əməliyyatlarımızı sığortalamış oluruq. Əsas məqsəd odur ki, əməliyyatdan sonrakı ağırlaşmalar az olarsa insanlar özləri üçün kompleks yaratdıqları hər hansı bir nahiyələrini estetik əməliyyatlarla aradan qaldıra bilərlər. Bu baxımdan insanlar artıq görürlər ki, ətrafdakı tanışları, digər ölkə və bölgələrdə olan insanlar estetik olunub kompleksdən qurtulurlar və ona görə də əməliyyata getmək istəyirlər”.
O vurğulayıb ki, insanlar plastik əməliyyatla bağlı mütləq şəkildə həkimin fikrinə önəm verməlidirlər.
“Bəzən pasiyent gəlir ki, mənə əməliyyat lazımdır, amma biz onu tövsiyyə etmirik. Hətta dünən əməliyyat etdiyim pasiyent bədən quruluşunda onun ölçülərinə proporsional olaraq uyğun gəlməyən bir forma istədi, amma biz onu fikrindən daşındırdıq. Əgər bir insan həkimə inanıb gəlirsə, onun fikirlərinə də inanmalıdır. Sözsüz ki, hər bir həkimin öz gözəllliyi görmə anlamı var. Plastik cərrahiyyədə müəyyən bir diapazonlar. Məsələn 7-dən 10-a qədər, A-dan C-yə qədər bir normativ var. Kimisi A, kimisi B, kimisi C seçir. Hər bir plastik cərrah bu normativlərdən birini seçərək onu cərrahiyyə əməliyyatlarında canlandırır. Bu baxımdan plastik cərrahların standartları fərqli ola bilər”.
Gülnar Səlimova
.jpg)
.jpg)
