Baharın gəlişi, təbiətin oyanması el arasında “qan qaynayan vaxt” kimi xarakterizə olunur. Qışın soyuğundan zəifləmiş insan orqanizmi təbiətlə bərabər canlanmaya başlayır. Bu isə özü ilə bir sıra allergik reaksiyalara səbəb olur.
Bəs “Yaz alergiyası“ adlanan bu əlamətlər necə və haradan yaranır?
Yaranma səbəbləri...
Baharın gəlişi əsasən mart-aprel aylarında özünü biruzə verən və bitkilərdə baş qaldıran tozlanma səbəbindən həssas insanlarda allergiya əlamətləri yaranır. Bu ağaclara- fındıq, şam, sərv və zeytun, bitkilərdən isə çəmən otları və yazda daha tez çiçəklənən digər bitkilər. Əsasən boğaz qıcıqlanması, göz yaşarması, asqırıq və qaşınmalarla müşahidə olunur. Bundan əlavə insanlarda burun, udlaq və gözün qıcıqlanması, ağız boşluğu və qulaqda qaşıntılar da müşahidə olunur.
Bu simptomlardan qorunma üsulları hansılardır?
Məsələ ilə bağlı həkim allerqoloq Ramin Nəriman Ednews-a bildirib ki, ümumiyyətlə tənəffüs sistemindən daxil olan allergenlərdən qorunmaq üçün müəyyən qaydalara riayət eləmək lazımdır.
“Əgər bir insanın bitki və ağacların tozlarına qarşı allergiyası varsa, həmin şəxsin küləkli havalarda bayıra çıxmaması, evin pəncərəsinin a bağlı saxlaması məsləhət görülür”.
Gözlərdə qaşınmanın qarşısının alınması üçün gün eynəklərindən istifadənin zəruriliyini vurğulayan həkimin sözlərinə görə, eynəklər toz hissəciklərinin gözə birbaşa təmas etməsinin qarşısını alır.
“Alergiyası olan şəxslər yaz aylarında gigiyenik qaydalara daha ciddi yanaşmalı, çöldən gəldikdən sonra duş qəbul etməli və üst geyimini tez-tez yumalıdır”.
Bu xəstəliyinin müallicə üsulları ilə bağlı sualımıza isə cavab olaraq Ramin Nəriman xəstəliyin sağalmaz olmasının yalnış məlumat olduğunu qeyd edib. Mütəxəssisin sözlərinə görə, allergiyanın ən vacib müalicə metodu peyvənddir.
Bundan əlavə həkim bu xəstələr üçün immunoterapiyanın da vacib olduğunu vurğulayıb.
“Müxtəlif dərman preparatları və qorunma üsulları allergik xəstəliklərin gedişini dəyişmir. Müalicədə yeganə vasitə immunoterapiyadır, belə ki, bu, allergik xəstəliklərin gedişini dəyişir. İmmunoterapiya dərmanlardan asılılığı azaltmağa, gələcəkdə allergik xəstəliklərin, buronxial asmaya keçməsinin qarşısını almağa və bu fonda digər tozlara və maddələrə qarşı qıcıqlanmanın inkişaf etməsinin qarşısının alınmasına yardım edir”.
Söhbət əsnasında mütəxəssis qeyd edib ki, bəzən digər allergik əlamətlərlə yaz qıcıqlanması simptomları dəyişik salınır.
“Məsələn kimyəvi məhsullara qarşı olan əlamətlər yaz allergiyası kimi reaksiya verir. Belə ki, asqırma, burundan şəffaf suyun gəlməsi, burun tutulması, gözlərin qızarması və s. kimi oxşar əlamətlərlə müşahidə oluna bilər. Lakin onlar fəsli xarakter daşımır və adətən kimyəvi məhsullarla təmasdan sonra bu cür əlamətlər yaranır”.
Qeyd edək ki, mövsümü xarakter daşıyan yaz allergiyası istənilən yaş dövrünə təsadüf etsə də yeniyetməlik dövrünə qədər oğlan, yeniyetmə dövrü vaxtı və sonrası isə qız uşaqlarında daha çox müşahidə olunur.
Ləman Abbaslı