Xəbər verdiyimiz kimi Operativ Qərargahın qərarına əsasən mayın 1-dən qapalı məkanlarda maska tələbi ləğv edilir. Bununla da Azərbaycanda karantin rejiminin yumşaldılması mərhələsində növbəti addım atılır.

Bəs görəsən Azərbaycanda maska rejimi ləğv olunduqdan sonra COVID pasportunun aqibəti necə olacaq? Yenə də qapalı məkanlara daxil olanda bu tələb qalacaqmı, yoxsa necə?

Məsələ ilə bağlı Ednews-a danışan tibb sahəsi üzrə ekspert, terapevt Rasif Bağırovun sözlərinə görə, maska tələbi çoxdan ləğv olunmalı idi.

“Artıq 15-20 gündür ki, koronavirus xəstəsinə çox az hallarda rast gəlmək olur. Amma COVID pasportunun maska tələbinə aidiyyatı yoxdur. Vaksinasiyadan keçən insan orqanizmində yaranmış immunitet sayəsində nə özü xəstələnə bilər, nə də ətrafdakıları yoluxdura bilər. Bu səbəbdən peyvənd olunmaq vacibdir. Çünki əks halda insan virusa yoluxa bilər və peyvənd olunmayanları yenidən yoluxdura bilər. Ona görə də vaksinasiya hamıda olunub qurtarmalıdır”.

Millət vəkili Razi Nurullayev isə Operativ Qərargahın maska rejimi barədə qərarından məyusluğunu dilə gətirib.

“Bu qərarla bağlı qismən şad olsam da, ümumilikdə məyusam. Çünki maskanın ləğvi o qədər də vacib məsələ deyildi, ləğv edilsin, amma vacib qərarları nəzərdən keçirmək əvəzinə maska ilə bu məsələni yola verdilər. Mən bununla razı deyiləm, çünki birmənalı olaraq quru sərhədləri açılmalı idi və mən bununla bağlı etirazımı bildirirəm. İkincisi, müxtəlif müəssisələrə daxil olarkən pasportların yoxlanılması problem və psixoloji təzyiq yaradırdı. Ən çox çətinliyi bu yaradırdı, maska yox. İnsanlar maskanı taxar da, taxmaz da. Bu könüllü idi, indi də könüllülük qaydasında həll olunacaq”.

Gülnar Səlimova