Bu gün Vətən müharibəsinin ilk və yeganə xanım şəhidi Arəstə Baxışovanın ad günüdür. Yaşasaydı 33 yaşını qeyd edəcəkdi. Deyirlər 33 yaş cənnət yaşıdır, Arəstə də bu ilini şəhidlərin ucaldıqları ən ali məqamda qeyd edir. Qismətində bu da var imiş...

 

Ednews şəhid Arəstə Baxışovanın doğum günündə qardaşı Vüqar Baxışovla onun əziz xatirəsini anıb. Çətin olsa da qardaşı Arəstəli günlərinə qayıdır.

 

“Arəstə 2004-2008-ci illərdə Azərbaycan Dövlət Pedaqoji Kollecində İngilis dili üzrə təhsil almasına baxmayaraq bir gün belə öz ixtisası üzrə çalışmayıb. Onun ürəyi hər zaman Vətən eşqi ilə döyünürdü”.

 

Söhbət əsnasında Vüqar Baxışov Arəstənin Hərbi Hospitalda çalışmasından da söz açıb.

 

“Arəstə 2007-ci ildə ailə qurdu. Amma şəxsi həyatı uğursuz alındı və 2016-cı idə həyat yoldaşından ayrıldı. O, 2018-2019-cu illərdə Ceyhun Səlimov, keçmiş “Papanin” küçəsində yerləşən Azərbaycan Silahlı Qüvvələrinin Baş Hərbi Hospitalında tibbi statist olaraq çalışıb. 2019-cu il iyulun 12-dən isə Azərbaycan Silahlı Qüvvələrinin Beyləqan rayonunda yerləşən "N" saylı hərbi hissəsində operator vəzifəsində xidmət edirdi”.

 

Qardaşının sözlərinə görə, Arəstənin müharibəyə getməsindən ailədə heç kimin xəbəri olmayıb.

 

“Hətta müharibə vaxtı da bizə bu barədə heç nə demirdi. Anamın narahat olmasını istəmirdi. Bircə zəng edəndə top səsi eşidirdik. Sonradan bildik ki, Vətən müharibəsi zamanı Füzulinin, Zəngilanın, Qubadlının azadlığı uğrunda gedən döyüşlərdə iştirak edib, yaralı əsgərlərə yardım edib.  Son dəfə oğlu ilə danışıb. Biz onun oktyabrın 23-də döyüş bölgəsindən yaralıları çıxararkən şəhid olduğunu eşitdik. Anamla son danışığı zamanı övladlarını anama vəsiyyət edib, Arəstə şəhid olacağını hiss edirdi...”.

 

İndi Azərbaycanın cəsur qızı Arəstənin özündən sonra iki övladı böyüyür. 12 yaşlı Mərdan, 11 yaşlı Zəhra... Onlar bir qəhrəman ananın Azərbaycana yadigar qoyduğu iki candır. Bəlkə də hazırda onlar Arəstənin şəhidlik zirvəsini, onun ucaldığı məqamını sona qədər dərk etmirlər, lakin bir gün onlar bunu mütləq biləcəklər...

 

Gülnar Səlimova

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary