Azərbaycanda distant təhsilə keçid üçün hazırlıq gedir.
Bu barədə Təhsil naziri Emin Əmrullayev bildirib ki, Azərbaycanda distant təhsil formasının tətbiqi istiqamətində işlər görülür və yaxın zamanlarda yeni sistemin işə salınacağı gözlənilir.
Nazir bildirib ki, hazırda bununla bağlı qanunvericilik bazası müzakirə olunur. Gələcəkdə distant təhsil də “Ali təhsil haqqında” Qanunda öz əksini tapacaq”.
Təhsil məsələləri üzrə ekspert Elçin Əfəndi Ednews-a açıqlamasında bildirib ki, distant təhsil Avropa ölkələri, ABŞ, Kanada, Sinqapur və s. dünyanın əksər ölkələrində var və diplomları da tanınır. O qeyd edib ki, ölkəmizdə də bunu tətbiq etməyimiz vacibdir, hətta bu məsələdə bir az da gecikmişik.
“Təhsil haqqında qanunvericiliyə görə ölkəmizdə əyani, qiyabi və distant şöbələr var. Sadəcə olaraq distant şöbədə diplomun tanınması problemdir. İstər xaricdə, istərsə də ölkə daxilində distant təhsil almaq “Təhsil Haqqında qanunda öz əksini tapsa da, nə Nazirliyin tabeliyində olan Təhsildə Keyfiyyət Təminatı Agentliyi tərəfindən, nə də müvafiq qurumlar tərəfindən tanınmır”.
E. Əfəndi qeyd edib ki, buna baxmayaraq, pandemiya dövründə distant təhsilin inkişaf etməsinin və onun tanımasının vacibliyini ortaya çıxardı.
“Təəssüflər olsun ki, pandemiya dövründə distant təhsilə hazır olmadığımız müşahidə edildi. Yalnız distant təhsil ənənəsi olan və o baza əsasında təhsil həyata keçirilən bəzi universitetlər vardı. Bütün bunlar onu deməyə əsas verir ki, distant təhsil mütləq ölkəmizdə yaradılmalıdır və bu istiqamətdə diplomların tanınması da mümkün olmalıdır. Çünki istər fövqəladə vəziyyət, istərsə pandemiya vəziyyətində distant formalı təhsil uzunmüddətli davam edə bilər. Bu təhsil formasına kifayət qədər ehtiyac duyan vətəndaşlarımız var. Bu imkandan daha çox ailə həyatı quran evdar xanımlar, fiziki qüsuru olanlar, eyni zamanda işləyən əhali təbəqəsinə aid şəxslər yararlana bilərlər”.
Ekspertin sözlərinə görə, əgər distant təhsil təşkil ediriksə, bunun üçün güclü nəzarət mexanizmi də yaradılmalı və şəffaflıq qorunmalıdır. Çünki burada da həqiqətən təhsil almayıb, lakin bunu iddia edənlər saxtakarlığa əl atıb diplomunu tanıda bilərlər.
Məsələ ilə bağlı Təhsil Nazirliyindən sorğumuza cavab olaraq bildirildi ki, hazırda bununla bağlı qanunvericilik bazası müzakirə olunur. Artıq bundan sonra ölkəmizdə distant təhsilin hansı formada təşkil olunacağı aydın olacaq.
Gülnar Səlimova
.jpg)
.jpg)
