“Son zamanlar ümumtəhsil məktəblərində baş verən neqativ hallar Milli Məclisin Elm və Təhsil Komitəsinin üzvü kimi məni çox narahat edir. Məktəb direktorlarının təyinatında yol verilən ciddi qanun pozuntuları neqativ halların dərinləşməsinə səbəb olur”.  

Ednews xəbər verir ki, bu sözləri Milli Məclisin deputatı Etibar Əliyev şəxsi “Facebook” hesabında yazıb. 

Etibar Əliyev ümumtəhsil məktəblərinin özündə çalışan direktor müavinlərinin təyinatdan kənarda qaldıqlarını, boş qalan direktor yerlərinə isə kənar məktəblərdən direktor müavinlərinin təyinat aldıqlarını iddia edib: 

“Bu isə kollektivdə intriqaların yaranmasına, idarəçilik ənənələrinin pozulmasına və bütün dünyada qəbul olunmuş sosial lift prinsipinin ayaqlar altına atılmasına səbəb olur. Konkret olaraq iki nümunə göstərəcəyəm. 

210 nömrəli tam orta məktəbə direktor 95 nömrəli tam orta məktəbdə direktor müavini işləyən Həqiqət Gülalıyeva birbaşa təyin olunub. 165 nömrəli tam orta məktəbə isə 252 nömrəli məktəbdə cəmi 1 ilə yaxın direktor müavini işləmiş Ruslan Nağıyev birbaşa təyin olunub.

Bildiyimiz kimi, ümumtəhsil məktəblərinə direktor vəzifəsinə təyinat təcrübəsi, şəxsi bacarıq və keyfiyyətləri əsas götürülməklə təlimlərə cəlb olunduqdan sonra müvafiq imtahan və müsabiqələrdən keçən şəxslər təyinat almalıdırlar. Verilən məlumatlara görə, hər iki şəxs faktiki olaraq imtahan və müsahibələrdə iştirak etməyiblər”.  

Belə halların artmasına diqqət çəkən Etibar Əliyev qapalı və mübhəm direktor təyinatlarının geniş vüsət aldığını vurğulayıb.

Millər vəkili Təhsil Nazirliyinin yanında İctimai Şuranın üzvlərinə müraciət edərək bu məsələyə münasibət bildirmələrini rica edib.