Şamaxıda türkdilli ölkələrin turizm üzrə İşçi Qrupunun 17-ci iclası keçirilir - FOTOLAR - ednews.net

7 İyul, Cümə axşamı

(+994 50) 229-39-11

Şamaxıda türkdilli ölkələrin turizm üzrə İşçi Qrupunun 17-ci iclası keçirilir - FOTOLAR

Cəmiyyət A- A A+
Bu gün Şamaxı şəhərində Türk Dövlətləri Təşkilatının (TDT) Turizm üzrə İşçi Qrupunun 17-ci iclası keçirilir.
 
Ednews bu barədə Dövlət Turizm Agentliyinə istinadən xəbər verir.
 
Məlumata görə, tədbir Türk Dövlətləri Təşkilatının turizm nazirlərinin sabah keçiriləcək görüşü çərçivəsində baş tutub.
 
İclasın gündəliyinə təşkilata üzv və müşahidəçi dövlətlərin iri şəhərləri arasında birbaşa uçuş sayının artırılması, bilik və təcrübə mübadiləsi əsasında tarixi İpək Yolunun turizm potensialının istifadə edilməsi, “Müasir İpək Yolu Birgə Turu”nun və “Türk Dünyası Turizm Paytaxtı” layihələrinin həyata keçirilməsi, qış turizmi üzrə əməkdaşlığın genişləndirilməsi və digər məsələlər daxildir.
 
İclasda BMT-nin Ümumdünya Turizm Təşkilatı tərəfindən həyata keçirilən layihənin analoqu olaraq türk dövlətlərinin “Ən Yaxşı Turizm Kəndləri” təşəbbüsü, turizm əhəmiyyətli ortaq mədəni irs elementlərini özündə birləşdirən İpək Yolu transmilli və seriya nominasiyası üzrə UNESKO-nun Dünya İrsi Siyahısına daxil edilməsi üçün birgə müraciətin hazırlanması üzrə tərəfdaşlıqla bağlı müzakirələr aparılır. Gündəliyə, həmçinin “Türk Dünyası Turizm Paytaxtı haqqında Əsasnamə”nin yekunlaşdırılması, “TDT-nin Turizm üzrə Yol Xəritəsi”nin tamamlanması və digər məsələlər daxil edilib.
 
Tədbirə Azərbaycan, Türkiyə, Qazaxıstan, Özbəkistan, Türkmənistan və Macarıstandan turizm siyasətini həyata keçirən dövlət qurumlarının təmsilçiləri və turizm üzrə mütəxəssislər qatılıb. TDT-nin Baş Katibliyinin iştirakı ilə keçirilən iclasda üzv dövlətlər arasında turizm əlaqələrinin inkişaf etdirilməsi üçün birgə turizm məhsullarının yaradılması və təbliğat tədbirlərinin gücləndirilməsi məqsədilə məqsədilə görüləcək işlər barədə razılaşmalar əldə edilib.
 
İşçi qrupun iclasının gündəliyində müzakirə olunan “Türk Dünyası Turizm Paytaxtı” layihəsinə əsasən 2022-ci il üçün Şamaxı şəhəri “Türk Dünyası Turizm Paytaxtı” seçilməsi təklif olunub. İclasda, həmçinin TDT-nin Turizm üzrə İşçi Qrupunun 18-ci iclasının yerinin və tarixinin müəyyən edilməsi müzakirə edilib. İşçi qrupun görüşünün yekunu olaraq razılaşdırılmış protokol imzalanmaq üçün sabahkı görüşə təqdim ediləcək.
 
TDT-nin turizm üzrə işçi qrupu təşkilatın 2013-cü ildə dövlət başçılarının iştirakı ilə Qəbələdə keçirilən üçüncü Zirvə Görüşü çərçivəsində yaradılıb.
1

1

1

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...