Cari ilin ali məzunları sosial şəbəkələrdə dövlət imtahanının ləğv olunması və nəticələrin Ümumi Orta Müvəffəqiyyət Göstəricisi (ÜOMG) əsasında yazılmalarını tələb edirlər. Onlar əsaslı səbəb kimi dərslərin üç semestir pandemiya dövründə, iki semestir isə hibrit təhsil formasında keçirildiyini göstərirlər. Tələbələr sosial şəbəkələrdə müəyyən həştəqlərlə dövlət imtahanının ləğvini istəyirlər.
Məsələ ilə bağlı təhsil eksperti Elçin Əfəndi də tələbələrin haqlı narazılıqlarını dəstəkləyir və hesab edir ki, dövlət imtahanı tələbəyə əlavə yükdən başqa bir şey deyil.
Dövlət İmtahanı yalnız tələbələrin kəsilməsinə şərait yaradır...
“Nəzərə alsaq ki, tələbələr bu illər ərzində distant təhsildən faydalanıblar, bu səbəbdən dövlət imtahanını vermək düzgün yanaşma deyil. Bu vəziyyətdə qiymətlərin ümumi ortalama ilə hesablanması məqsədəuyğundur. Tələbələrin distant təhsil səbəbindən dərslərinin yaxşı mənimsəməməsi və sonunda dövlət imtahanı verməsi ancaq kəsrlə nəticələnə bilər. Dövlət İmtahanı yalnız tələbələrin kəsilməsinə şərait yaradır. Hətta oğlan tələbələrin dövlət imtahanından kəsilməsi onlara hərbi xidmət dövrünün bir il deyil, 18 ay çəkməyə başa gəlir. Baxmayaraq ki, onlar dörd il universtitet oxuyublar. Bundan başqa magistiraturaya, müəllimlərin işə qəbul imtahanına hazırlaşan tələbələr də var. Onlar bu zaman hansı imtahana hazırlaşacaqlarını bilmirlər. Tələbələr dövlət imtahanına, magistiraturaya yoxsa müəllimlərin işə qəbulunamı hazırlaşsın? Düşünürəm ki, tələbələri incitmədən, bunlar nəzərə alınmalıdır”.
Məsələnin aktuallığını nəzərə alaraq Milli Məclisin üzvü Etibar Əliyevlə əlaqə saxladıq. Ednews-a açıqlamasında tələbələrin haqlı olduğunu bildirən deputat dövlət imtahanını süni maneə olduğunu qeyd edib.
“Mən tələbələrin tərəfindəyəm. Dövlət imtahanı Sovetlərdən qalma metoddur. Məqsədsə rektorların müəyyən maddi məqsəd güdməsidir. Əgər tələbə ixtisası üzrə proqramı mənimsəyib, müvafiq praktikaya yiyələnibsə bu, qiymətlərdə öz əksini tapmalıdır. Bu zaman tələbəyə birmənalı şəkildə diplom verilməlidir. Yəni dövlət imtahanının ləğvinin tərəfdarıyam. Bu süni maneədir. Müasir dövrdə yaşayırıqsa, dövrün tələblərinə uyğun hərəkət etməliyik”.
Milli Məclisdə bununla bağlı qərarların verilməsi düşünülürmü?
Deputat Etibar Əliyevin sözlərinə görə, məsələkomitə iclaslarında bir neçə dəfə müzakirəyə çıxarılıb.
“Milli Məclisdə ali təhsil haqqında qanunun müzakirəsi gedir. Bir neçə dəfə məsələ Elm və Təhsil komitəsində müzakirə olunub. Amma hələ plenar iclasa çıxarılmayıb. Qanunun plenar iclasa çıxarılması ərəfəsində şəxsən mən bu məsələni parlamentdə qaldıracam. Çünki tələbə daha çox əziyyət çəkməyə məcbur deyil”.
Ləman Abbaslı
