Azərbaycan Prezidenti yanında Əfv məsələləri Komissiyasının iclası başa çatıb. Komissiyanın iclaslarının 28 May Müstəqillik Günü münasibəti ilə nəzərdə tutulan əfvlə bağlı keçirildiyi gözlənilir.
Əfv komisiyasının üzvü Zahid Oruc Ednews-a açıqlaması zamanı əfv olunanların hansı kateqoriyaya aid olduqları barədə danışıb.
“Komissiya üzvləri müəyyən təlimata əməl edirlər. Bu da öz növbəsində mövzunun həssaslığından irəli gəlir. Doğrudur, əfv qərarı verildikdən sonra adlar bəlli olur, amma yenə də bir hissəsi qapalı qalır. Hər bir baş verən cinayətin xarakteri, özünəməxsusluğu var və belə şəraitdə iki ildir ki, şəffaflıqla qərar verilir. Bunun bariz nümunəsi 18 saatlıq iclasları göstərmək olar. Burada ədalət və hümanizm prinsiplərinə əsas götürülməsi deməkdir. Buna görə də müzakirə olunan şəxslər, onların adları, sayı haqqında məlumatların verilməsi doğru olmazdı. Kateqoriyalar bunlardır:
Cinayətin təhlükəlilik dərəcəsi;
İctimai təhlükəli əməl sahibi olmayanlar;
Ailə vəziyyəti, himayəsində yetkinlik yaşına çatan uşaqların olması;
Ziyançəkən tərəflə aralarında razılaşma olanlar;
Şəhid, qazi ailəsi və qohumları”
Zahid Oruc ömürlük cəza alan məhbusların əfvi ilə bağlı məsələyə də aydınlıq gətirib. O, qeyd edib ki, 25 il keçdikdən sonra bu məhbusların cəzalarını yüngülləşdirilməsi üçün məhkəməyə müraciət etmə hüquqları var.
“Lakin ömürlük cəza çəkən məhbuslar 10 il keçdikdən sonra əfvlə bağlı müraciət edə bilərlər. Keçən il 2 nəfərin cəzasının müddətli olması ilə bağlı addım atılıb”.
Qeyd edək ki, 2021 ci ilin fevralında başlayıb, martına qədər keçən 10 iclasda 625 nəfərin əfvi ilə bağlı addım atılıb. Həmçinin noyabrın 5-də “Zəfər” amnistiya qərarı verilib. Ondan faydalanan 17 minə yaxın insan olub. İndiyədən 68 əfv qərarı verilib.
Ləman Abbaslı