Mebel sifariş verən müştəri şirkət tərəfindən aldanıldığını iddia edib. Bu barədə redaksiyamıza mebel şirkətindən şikayətçi olan Günay Məmmədova bildirib.
“Birinci dəfə onların səhifəsini izləyicisinin çox olduğunu gördükdə, onların peşəkar usta olduğunu düşündüm. Bu məndə güvən yaratdı. Bir müddət sonra onlarla əlaqə yaradaraq, mebel sifariş vermək istədiyimi bildirdim. Noyabrın biri Günay İsmayılova adlı əməkdaşla danışıb, sifarişimi verdim. İlk olaraq, avans üçün 200 ABŞ dolları ödəməli olduğumu bildirdilər. Mən də noyabrın 10-da behi ödədim. Mənə dedilər ki, bir həftəyə sifariş hazır olacaq, 17-si isə bildirdilər ki, sifarişi çatdıra bilmirik. 2-3 gün aralığında əlaqə saxladım yenə də eyni sözlər. Artıq dekabr ayı oldu, dedim ki, pulumu qaytarın. Heç pulumu da qaytarmadılar”.
Söhbət, yeri və sahibinin adı bəlli olmayan mebel evindən gedir. Sözügüdən mebel şirkəti “Evdə group” adı ilə fəaliyyət göstərir. Ancaq şirkətin harada kimlər tərəfindən fəaliyyət göstərməsi məlum deyil. Sifarişçi mebel sifariş verir, qəbul edənlər isə min cür yalanla sifarişçini aldadır.
Günay xanım həmçinin deyir ki,- “sonra güc bəla ilə 100 manatımı qaytardılar. Verilən behin 200 dollar olduğunu bildirəndə isə 200 dollarla nə siz kasıblayacaqsız, nə də mən varlanacam”,- deyə mənə bildirdilər.
Şikayətçi onu da qeyd edib ki, onlardan bir neçə dəfə sexin harada yerləşdiyini soruşsalar da bir şey demədən, mövzunu dəyişiblər.
“Mən neçə dəfə sifarişi qəbul edən xanımdan ərazinin harada olduğunu soruşdum mənə dediki bilmirəm. Necə yəni bilmirəm? Mebellər harada hazırlanır bəs?”
Öncə sifarişi qəbul edən xanımla əlaqə saxladıq. İşçidən rəhbərlərinin adını soruşsaq da “bilmirəm, mən sadəcə onlayn işləyirəm, olanlardan da xəbərim yoxdur”, deyə qeyd etdi. Halbuki sifarişi həmin xanım qəbul edib. Xanım sonda qeyd edib ki, şirkətdə ancaq onlayn işləyirəm.
"Mənim heç bir aidiyyatım yoxdur. Problemlərini özləri həll etsin, mənlik bir şey yoxdur. Ümumiyyətlə olanlar nədir xəbərim yoxdur. Mebel seximiz isə müxtəlif yerlərdə yerləşir. İnşaatçılar, Qara Qarayev, 20 yanvar və s...”.
Məsələ ilə bağlı mebel şirkətinin müdiri ilə əlaqə saxladıq. Bizə adının Vüsal olduğunu bildirən şəxsin sən demə əsl adı Cavid imiş. İşçi bir yana sex müdiri sifarişin gecikməsinə başqa bəhanə gətirdi.
“Əslində mebel bizdə hazır idi. İki gün gecikməyə görə məsələni bu qədər böyütmək lazım deyildi. Həmin vaxtı zavodda işıq dörd gün idi partlamışdı. İşıq sistemi yox idi, ona görə işlər gecikdi. Onlar da işi yalandan bu qədər böyütdülər. Pul da nə qədərdir ki, 200 dollar. Sifarişçinin də pulunun bir hissəsini ona vermişik. O ki, qaldı yerin harada olmasına sexing bir ünvanı var. Görüşmək üçün istənilən yer təyin edə bilərlər”.
Məsələni diqqətdə saxlayacağıq…
Ləman Abbaslı
