Bakıxanovda yerləşən məktəblərdən birinin yaxınlığında əxlaqsızlıq edən şəxslə bağlı sosial şəbəkələrdə video yayılıb.

 

İzləyənlər tərəfindən birmənalı qarşılanmayan görüntülər əsasən məktəbli övladı olan valideynləri daha çox narahat edib. Cəmiyyətdə bu cür davranış sərgiləyən insanlar orta ümumtəhsil məktəblərində yetkinlik yaşına çatmayan şagirdlər üçün əsl təhlükə mənbəyidir.

 

Bəs şagird və məktəblərin təhlükəsizliyi necə qorunmalıdır?

 

Təhsil eksperti Elçin Əfəndi Ednews-a açıqlaması zamanı bildirib ki, həmin məktəb mütləq hüquq-mühafizə orqanları tərəfindən qorunmalıdır. 

 

 

“Şagirdlərin, orada çalışan müəllim və digər işçi heyətinin mühafizəsi təmin olunmalıdır. Əxlaqsızlıq və insan alveri  ilə məşğul olan, narkotik satan şəxslərdən qorumaqla bağlı tədris müəssisələrində daim təhlükəsizlik məsələsinə ciddi riayət edilməlidir”.

 

Ekspert qeyd edib ki, Azərbaycanda fəaliyyət göstərən 4447 orta ümumtəhsil müəssisəsi var və burada 1 milyon 900 min şagird təhsil alır. Bunun paralelində təxminən 160 min müəllim və idarəetmə üzrə 20-30 min şəxs çalışaır.

“Bu kifayət qədər böyük kontingent hesab olunur. Onların təhlükəsizliyi diqqətdə saxlanmalıdır. Şagirdlər, xüsusən də ibtidai sinif şagirdləri üzərində nəzarət xüxusilə ciddi olmalıdır. Məktəblərin nəinki daxilində, eləcə dəhəyətyanı ərazisində izləmə kameraları quraşdırılmalıdır. Beləliklə, tədris müəsisəsində kənar şəxs gördükdə hüquq-mühafizə orqanları dərhal hərəkətə keçib onu sorğu-sual etməlidir. Əgər əxlaqsızlıq yaxud narkotik satışı ilə məşğuldursa müvafiq tədbir görməlidir”.

 

Sosioloq Ağasəlim Həsənov bu hadisəni Azərbaycan cəmiyyətində gedən mənəvi-əxlaqi dəyərlərin aşınması prosesi kimi qiymətləndirib.

 

 

“Son onilliklərdə bu və buna bənzər bir çox halların şahidi oluruq. Bu gün orta məktəb ətrafında bu cür halların müşahidə olunması da bunun nəticəsidir. Düşünürəm ki, Təhsil Nazirliyi orta məktəblərdə din dərslərinin keyfiyyətli səviyyədə tədrisini təşkil etməlidir. İnsani keyfiyyətlərin aşılanması, əxlaqa zidd davranışlardan yayınmalara yönəlik ən güclü təsir vasitələrindən biri dindir. Orta məktəb şagirdlərinin anlaya biləcəyi səviyyədə sistemli şəkildə din dərsləri, həyat bilgisinə dair məlumatları, mənəvi dəyərlərimizi aşılayan dərslərin yüksək nəticələr verəcəyini düşünürəm”. 

 

O, ailənin bir institut olaraq bu işin öhdəsindən gəlməkdə çətinlik çəkəcəyini qeyd edib.

 

“Bu məsələlər bütün hallarda cəmiyyətin, sosial institutların üzərinə düşür. Bunun qarşını zamanında almasaq bir müddət sonra adi həyat tərzinə də çevrilə bilər. Bəşəriyyətin indiki intibah dövründə bu cür əxlaqa zidd davranışların sərgilənməsi, hətta bunun orta məktəblərdə şagirdlər arasında nümayişkaranə ortaya çıxması ciddi narahatlıq yaradır. Düşünürəm ki, biz dövlət və cəmiyyət olaraq məsələni diqqətlə saxlamalı, alternativ çıxış yollarına da baxmalıyıq”.

 

Gülnar Səlimova

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary