2022-ci ildə Rusiyanın Ukraynaya hücumu nəticəsində dünyadakı gərginlik artıb. Qərb dövlətləri Moskvanın işğalını dayandırması üçün müxtəlif sahələrdə sanksiyalar tətbiq etdiklərinə görə Rusiya ilə yanaşı onunla ticarət əlaqələri olan dövlətlərə də mənfi təsir göstərib.
Mayın 26-da Avropa İttifaqına üzv ölkələr sanksiyalar çərçivəsində Rusiya Mərkəzi Bankının təxminən, 23 milyard avro məbləğində aktivlərini dondurulub. ABŞ isə Rusiya Mərkəzi Bankının 100 milyard dollarlıq aktivlərinin dondurulması prosesini həyata keçirib.
Bu ölkədə yaşayan azərbaycanlılar banklarla bağlı bir çox problemlərlə qarşılaşdıqlarını tez-tez bildirirlər. Xüsusilə, ölkəmizdəki yaxınlarına bank vasitəsilə pul vəsaiti göndərmək istədikləri zaman yaşadıqları çətinliklərdən narazıdırlar. Rusiyanın Mərkəzi Bankına tətbiq edilən sanksiyaların Azərbaycana necə təsir edəcəyi maraq doğurur.
Məsələ ilə bağlı Ednews-a danışan iqtisadçı Əkrəm Həsənov bildirib ki, Rusiyaya qarşı tətbiq edilən sanksiyaların Azərbaycana həm müsbət, həm də mənfi təsiri var.
“Sanksiyaların mənfi təsirləri kifayət qədərdir. Məsələn, bu ölkədə yaşayan azərbaycanlılar ölkəmizə pul transferi etməkdə çətinlik çəkir. Həmçinin Azərbaycandakı biznesmenlərin Rusiyadakı iş adamları ilə işgüzar əlaqələr qurmağının çətinləşməsi sanksiyaların mənfi təsirlərindəndir. Sanksiyaların müsbət tərəfləri də var. Məsələn, Rusiyadan Azərbaycana müxtəlif yollarla vəsait axını var. Oradan Azərbaycana kifayət qədər sahibkarlar gələrək bizneslərini artıq buradan idarə edirlər. Bunun nəticəsində də son zamanlar banklarımızın əmanət bazası artıb”.
Ekspert Rusiyaya qarşı uzunmüddətli sanksiyaların tətbiq edilməsinin Azərbaycana sərf etmədiyini də vurğulayıb:
“Şimal qonşumuzun iqtisadi cəhətdən zəifləməsi ölkəmizin biznesi üçün ziyanlıdır. Neft və təbii qazdan başqa bir çox şeyi rahat şəkildə dünya bazarına çıxara bilmirik. Qalan bütün mallar, hamısı Rusiyaya satılır. Kənd təsərrüfatı məhsullarımızın əksəriyyəti şimal qonşumuza ixrac edirik. Ona görə də, sanksiyaların uzunmüddətli olmağı Azərbaycan iqtisadiyyatı üçün mənfidir”.
Xanlar Əlibəy