Artıq 3 gündür Bakıda “TEKNOFEST Azərbaycan” Aerokosmik və Texnologiya Festivalı start götürüb.
“TEKNOFEST” Türkiyənin Sənaye və Texnologiya Nazirliyinin, eləcə də Selçuk Bayraktarın rəhbərlik etdiyi “Türkiye Teknoloji Takımı” (T3) Vəqfinin təşkilatçılığı ilə 2018-ci ildən etibarən hər il keçirilir. Bu il isə festival ilk dəfə olaraq Azərbaycanda təşkil olunub.
Festivalıın ölkəmiz üçün əhəmiyyəti barədə Ednews-a danışan texno-bloger Fərid Pərdəşünasın sözlərinə görə, TEKNOFEST gənclərin motivasiya olunması baxımdan çox önəm daşıyır.
“Bu təkcə aviaşoulardan, konsertlərdən, uçan aparatların nümayişindən ibarət deyil. “TEKNOFEST” mərhələli, müxtəlif bölmələri əhatə edən turnirdir. “Kristal Hall”da startup, hakaton, kiber idman oyunları üzrə dünya səviyyəli çempionatlar təşkil olunur. Azərbaycanı təmsil edən çox sayda komanda var. Hazırda TEKNOFEST birbaşa azərbaycanlı gənclərdən təşkil olunan komandaların iştirakı ilə keçirilən festivala çevrilib”.
Texno-bloger həmçinin qeyd edib ki, tədbirə gələn qonaqların böyük hissəsini yaş qrupu aşağı olan, texnologiyaya maraq göstərən yeniyetmələr təşkil edir.
O, qeyd edib ki, bu çox yaxşı haldır, çünki festival azyaşlılarda bir növ motivasiya, həvəs yaratmağa kömək edəcək.
“Bu uşaqlarda texnikaya, müasir startaplara, yeniliklərə böyük maraq yaradacaq. Bu tendensiya onların təfəkküründə artıq kiçik yaşlarından formalaşacaq. Azərbaycanın bu sahədə ancaq “Bakutel” təcrübəsi var idi. Ancaq “Bakutel” festival deyil, o daha çox sərgi xarakterli təcrübə idi”.
Ekspert bildirib ki, Azərbaycan müəyyən texnoloji inkişaf dövrünü keçib özünün istehsal etdiyi cihazlara sahib olsa, hərb sahəsində əldə olunan naliyyətlər daha da populyarlıq qazana biləcək.
“Ancaq hazırda Türkiyə-Azərbaycan ortaqlığı ilə daha yaxşı sınanmış təcrübəni ölkəmizdə tətbiq edirlər. Görünən odur ki, izləyicilər də, tədbirə qatılanlar da bu festivaldan razıdırlar. Bu, iki qardaş ölkənin ortaq tədbiri halına gəlib. Azərbaycan təşkilatçlılıq, iştirakçılıq səviyyəsində böyük əmək sərf edib. Orada olan stendlərin böyük əksəriyyəti, əsas sponsorlar Azərbaycan şirkətləridir. Komandalar Azərbaycan komandalarıdır. Düşünürəm ki, Türkiyə və Azərbaycan bu festivalla dünyaya böyük bir mesaj verdilər”.
Qeyd edək ki, “TEKNOFEST Azərbaycan”ın yerli təşkilatçısı Rəqəmsal İnkişaf və Nəqliyyat Nazirliyidir. Festivalda 4 gün ərzində ümumilikdə 200 mindən çox ziyarətçinin (33 ölkədən 500-ə yaxın əcnəbi) iştirakı proqnozlaşdırılır.
Bu il mayın 20-si tarixinə olan məlumata əsasən, 45 682 ziyarətçi qeydiyyatdan keçib, akkreditasiya sayı isə 9 897-dir.
Tədbirdə qlobal bazarlara çıxış potensialı olan startapçıların, yerli və əcnəbi mentorların, xarici ölkələrdən investorların və vençur fondların iştirakı nəzərdə tutulur.
Festival çərçivəsində "SMART QARABAĞ" Hakatonu keçirilir. Hakatonun məqsədi işğaldan azad edilmiş ərazilər üçün “ağıllı” şəhər, kənd, ev təsərrüfatı, nəqliyyat və s. həllərin yaradılmasıdır.
Gülnar Səlimova
