Ukrayna ərazisində gedən müharibə bir çox ölkələrə öz təsirini göstərib. Rusiya Ukrayna torpaqlarında irəliləyərək bu ölkənin limanlarını mühasirəyə alıb. Limanların mühasirədə saxlanması nəticəsində 7 milyon ton buğda, 14 milyon ton qarğıdalı dəni, 3 milyon ton günəbaxan yağının və digər məhsulların dünya bazarına yolu bağlanıb. Yaranan vəziyyətin Azərbaycana necə təsir edəcəyi maraq doğurur.
Məsələ ilə bağlı Ednews-a danışan iqtisadçı Ruslan Atakişiyev bildirib ki, hökumət hər zaman əvvəlcədən tədbirlər planı hazırlayır:
“Əhalinin zəruri ərzaq məhsulları ilə təmin edilməsi üçün dövlət hər vəziyyətə hazırdır. Öncədən tədbirlər görülərək qıtlığın qarşısını almağa çalışırlar. İqtisadi əlaqələr müharibələrdən, ölkələrin limitlər qoymağından və digər proseslərdən təsirlənə bilir. Bu səbəbdən dövlətlər alternativ mənbələr tapırlar. Həmin mənbələr ilə ticarət əlaqələri quraraq ölkənin ehtiyatını qorumağı hədəfləyirlər”.
Ekspert taxıl və dənli bitki məhsullarının çox əhəmiyyətli olduğunu da vurğulayıb:
“Taxıl və dənli bitki məhsulları ilə dövlət xüsusi məşğul olur. Ukrayna bu məhsulun əsas ixracatçılarındandır. Əgər Ukraynadan məhsul gəlməzsə, idxal etdiyimiz digər ölkələrin ixrac payını artırmaqla, ehtiyatı qoruya bilərik. Lakin dəyişikliyin olması xərcləri artırır. Bu da bahalaşmaya səbəb ola bilər. Həmçinin duru yağ üçün də eyni addım atıla bilər”.
Xanlar Əlibəy