Sabah Bakıda start götürəcək Formula 1 Azərbaycan Qran Prisi yarışları ilə əlaqədar olaraq Bakının bir çox otel və hostellərində qiymətlər işıq sürəti ilə yüksəlib. Bu həm də turistlərin paytaxt Bakıya axın etməsi ilə bağlıdır.
Azərbaycan Hotellər və Restoranlar Assosiasiyasının İdarə Heyətinin sədri, Azərbaycan Ekoturizm Assosiasiyasının icraçı direktoru Samir Dübəndi bildirib ki, yarışları izləməyə bir sıra Avropa ölkələri və digər ölkələrdən turistlər gəlir. Bu da istər hotellərin, istərsə də kirayə mənzilərin qiymətlərinə təsir edir. Məsələ ilə bağlı bir neçə otellə əlaqə saxladıq. Bir gecəlik ortalama qiymət 300 manatdan 900 manata qədər olduğunu bildirdilər. Bu məbləğə ancaq axşam saat 6-dan səhər 12-ə qədər qalmaq daxildir. Əgər siz səhər və ya axşam yeməyi istəsəniz rezerv qiymətindən əlavə xərc çəkmək məcburiyyətindəsiniz.
Bəs həqiqətən bir neçə aya nisbətdə qiymətlərin bu qədər qalxmasına səbəb nədir?
Məsələ ilə bağlı "Azərbaycan Turizm Assosiasiyası" İctimai Birliyinin İdarə Heyətinin sədri Əhməd Qurbanov bildirib ki, qiymətlərdə ümumi artım 30-40 faiz təşkil edir, bu isə həm yay mövsümü, həm də Formula1 yarışması səbəbindəndir.
“Hazırda pandemiyanın zəifləməsi ölkəmizə turist axınına da şərait yaradıb. Yay mövsümü qiymətlər hər zaman yüksək olur. Bu baxımından da həm Formula1, həm də yay fəsli turist axınına səbəb olur. Bu həm paytaxt, həm də region otellərinə aid edilir. Həftəiçi paytaxtda, həftəsonu regionda yerləşən otellərdə qiymətlər bahalaşır. Bəzən bir oteldə 50 faiz, digər oteldə 10 faiz qiymət artımı olur. Artıq bu otellə görə tənzimlənir. Ümumi olaraq isə hazırda 30-40 faiz artım müşahidə olunur”.
Əhməd Qurbanov Ednews-a açıqlaqması zamanı həmçinin bildirib ki, bu il Azərbaycana 2019-cu ilə nisbətən daha çox turist gəlib. Hətta indidən otellərin 85-90 faizi doludur.
“2019-cu ildə Azərbaycanı 3 milyondan çox turist səfər edib. 2020-21-ci illər isə məlum səbəb pandemiyadan dolayı turistlərin gəlişi qadağan olunub. Ancaq bu il 170-dən artıq ölkə ilə hava məkanı açıqdır. Manitorinqlər göstərir ki, Formula1 yarışına görə həm regionlarda, həm paytaxtda otellərin 85-90 faizi doludur. Bu da kifayət qədər yüksək nəticədir. Yarışdan sonrakı dövrdə isə otellərin 60-70 faizi artıq rezerv olunub. Bu da yetəri qədər yaxşı göstəricidir”.
Qeyd edək ki, Formula 1 Azərbaycan Qran Prisi 10-12 iyun tarixlərində Bakıda baş tutacaq.
Ləman Abbaslı
.jpg)
.jpg)
