Xalq artisti Rasim Balayevin Azərbaycan Kinematoqrafçılar İttifaqına sədr seçilməsi, bəziləri üçün sevindirici olsa da, bu seçimə qarşı çıxanlar da olub. Belə ki, Xalq artisti Əbdül Mahmudovla kinorejissor Ayaz Salayev Rasim Balayevin ittifaqın sədri seçilməsi ilə bağlı mediada narazılıqlarını bildiriblər.
Rasim Balayev mətbuata açıqlamasında Əbdül Mahmudovun ona qarşı dediyi sözləri qərəzli adlandıraraq, “Onun nə sənətdə, nə də ki insanlıqda izi yoxdur. Həyatı boyu bir kino çəkib o da “İki sahil”" ifadəsini səsləndirib.
Rasim Balayevin ittihamlarına cavab olaraq, Ednews-a danışan Əbdül Mahmudov “onu kinoya mən gətirmişəm, o, mənim kölgəm altında Rasim Balayev olub”, - deyə bildirib.
“Rasim Balayevə demək istəyirəm ki, hər kəsin Rasimi tanıdığı Nəsimi filmini yadına salsın. O, nə həddlə mənə belə sözlər deyir. Mən ömrümün 60 ilini kinoya sərf etmişəm. "Diplom" filmini yadına salsın. Daha sonra "Firəngiz" filmi, "Qaçaq Nəbi" filmi, elə təkcə bu filmlərdə Rasimin özün yer alıb. Mən aktyorluq edib kinoya çəkiləndə Rasim Balayev kinomatoqrafçılar ittifaqının qapısını tanımırdı. Sən mənim kölgəmdə fırlanmamısan, unutma, Rasimi mən çıxarıb Balayev eləmədim?! İnsafın, vicdanın olsun. Mən faktlarla danışıram”.
Təşkilatın seçki orqanı olduğunu bildirən Rasim Balayevin heç bir xüsusi tapşırıq olmadan sədr olmaslna cavab olaraq, Əbdül Mahmudov Xalq artistini səhv yolda olduğunu və ondan istifadə etdiklərini bildirib.
“Cənab Balayev eləmə belə, lazım deyil. Milləti iki yerə bölüb, üz-üzə qoymayın. Siz tərəfdə adamlar var ki, onların konkret bu sahədə maraqları var. İttifaqın bir istəyi var. Yalançı məktublar və timsah göz yaşları ilə nəsə dilənsinlər, nəsə alsınlar. Ay Rasim Balayev, sən aktyorsan, ruslar ermənilərdən istifadə etdiyi kimi, səndən də bir vasitə kimi istifadə edirlər. Adı ilə deyirlər ki, səni hər kəs tanıyır, sən ittifaqın sədri ol. Ay Rasim, ay mənim dostum düşmə onların quyusuna. Utanmırsan, hələ mənə, müəlliminə belə ifadələr işlədirsən?!"
Ləman Abbaslı