“Ağdamı gördükdən sonra öz-özümə deyirəm ki, Qərbdə bu qədər insan Ermənistanı necə dəstəkləyə bilər? Ermənilərin o gözəl şəhərə qarşı törətdikləri bəşəriyyətə qarşı bir cinayətdir. Bu çox sarsıdıcı bir səhnədir. Bütün binalar dağıntı və xarabalıqdan baş bir şey deyildi”.

Bu sözləri Ednews-a açıqlamasında israilli jurnalist Reyçel Avraham deyib. Jurnalist 30 illik erməni separatçılarının işğalından sonra azad edilmiş Ağdamın sonrakı aqibətinə şahid olduğu barədə təssüratlarını belə izah edib:

“Ağdam mənə Suriyanı xatırladırdı. Bizi qəbiristanlığa apardılar, orada dəfn olunanların qızıl dişlərini oğurlamaq üçün ermənilər qəbirləri qazmışdılar. Ölənlərin sümükləri ətrafa səpələnmişdi, məzar daşları dağıdılmışdı. Daha sonra bizi tarixi Çörək Muzeyinə apardılar, burada İkinci Dünya Müharibəsindən qalan tarixi bir çörək sexinin parçaları qalmışdı. Məhv edilmiş binadan qismən görünən yalnız divar şəkli idi.

Daha sonra bizi bir məscidə apardılar, orada öyrəndik ki, ermənilər burada donuz və at saxlayıblar. Fikrimcə, bu, bir qədər İspan inkvizisiyasına bənzəyirdi, çünki o dövrdə ispanlar da sinaqoqlara və məscidlərə qarşı eyni şəkildə davranırdılar. Sonra bütün bunları gördükdən sonra öz-özümə dedim, görəsən dünya erməni vəhşətinə qarşı necə bu qədər soyuqqanlı ola bilər? Ermənistanı dəstəkləmək İspaniya inkvizisiyasını dəstəkləmək kimidir. Bu, şüurlu olan hər kəs üçün ağlasığmazdır”.

Jurnalist həmçinin Azərbaycana bir daha səfər etməkdən məmnun olduğunu bildirib və növbəti səfəri zamanı bəzi planları barədə danışıb:

“Mən hər zaman Azərbaycana səfər etmək üçün sevinclə can atıram. Ümid edirəm ki, yəhudilərin əziz bayramlarından sonra oktyabrın son həftəsində gözəl Azərbaycana bir daha səfər edəcəyəm.

Bunu da əlavə edim ki, növbəti səfərimə qədər bütün gördüklərim və Qarabağ haqda bir yazı yazacam və eyni zamanda ölkədəki təssüratlarla bağlı konfrans da təşkil edəcəm”.

Media nümayəndəsi bildirib ki, Qarabağın əzabkeş xalqının acınacaqlı vəziyyəti, habelə erməni separatçılarının Qarabağı minalarla ölüm məkanına çevirməsi haqqında məlumatları dünyaya çatdırmaq üçün bu yaxınlarda “Dona Qrasiya” Diplomatiya Mərkəzini təsis edib.

“Hesab edirəm ki, mina məsələsi ilə bağlı hər yerdə maarifləndirmə işinin aparılması böyük əhəmiyyət kəsb edir. Ermənistan tərəfi Qarabağda mülki şəxslərin həyatına təhlükə yaradaraq əraziləri minalarla çirkləndirməklə beynəlxalq hüququ pozub. Həmçinin, hərbi əməliyyatlar dayandırıldıqda ermənilərin xəritələri təhvil vermək kimi bir öhdəliyi var. Lakin onların təhvil verdikləri xəritələtin yalnız 25 faizi istifadəyə yararlıdır”.

İsrailin keçmiş rabitə naziri Ayoob Kara ilə birgə Azərbaycanda səfərdə olan jurnalist, Qarabağda minaların təmizlənməsi üçün yeni robot texnologiyaları və onun Azərbaycana dəstək əhəmiyyəti barədə də söz açıb. 

“İsrail mühəndisləri mina xəritələri olmadan onları təmizləyə biləcək yeni robotlar ixtira ediblər. Artıq Qarabağda xəritələr olmadan qısa zamanda minalardan qurtulmaq mümkün olacaq. İnanıram ki, bu, Qarabağda inkişaf layihələrinin sürətlə irəliləməsinə öz töhfəsini verəcək. Qeyd edim ki, İsraıl tərəfi bu yeni texnologiyanın Qarabağda tətbiqi barədə Azərbaycan hökuməti ilə danışıqlar apararaq müəyyən təkliflər də ediblər”.

Qeyd edək ki, iyunun 11-16 tarixlərində Azərbaycan Diaspor Komitəsinin təşkilati dəstəyi ilə İsrail, Böyük Britaniya, Fransa və digər ölkələrdən tanınmış siyasətçilər, diplomatlar və jurnalistlər Azərbaycanda səfərə gəliblər. Görüş zamanı nümayəndə heyətinin işğaldan azad edilən Ağdam şəhərinə səfəri təşkil olunub. Qonaqlara Qarabağın minalanan əraziləri barədə məlumat verilib, o cümlədən gündəlikdəki mühüm məsələlər və prioritetlər müzakirə edilib. Ağdama səfərdən sonra ADA Universitetində qonaqlarla “Cənubi Qafqazda münaqişədən sonrakı dövrdə inkişaf” adlı dəyirmi masa keçirilib.

Elnur Ənvəroğlu

• Tag:
• Elnur Ənvəroğlu
• İsrayıl
• Rachel Avraham
• Qarabağ