Yevlax şəhərində yerləşən məktəbdə müəllim şagirdlərə İmam Zamana həsr olunan “Salam Fərmandeh” (Salam komandir) mahnısını ifa etdirib.
Bu barədə video görüntüləri “Turan Tim” telegram kanalı yayıb. Sosial şəbəkə istifadəçiləri şərhlərdə müəllimin hicablı olması, eyni zamanda dini görüşlərini şagirdlər arasında təbliğ etməsi, həmçinin, Azərbaycan bayrağının düzgün asılmamasının yanlış olduğunu bildirərək etiraz ediblər.
Məsələnin aktuallığını nəzərə alaraq Yevlax rayon təhsil şöbəsi ilə əlaqə saxladıq. Yevlax Təhsil Şöbəsinin məsləhətçisi Ümidvar Mamedovun verdiyi məlumata görə video Yevlax şəhər 1 saylı tam orta məktəbində çəkilib.
“Hadisə Yexlax şəhər Sahib Əliyev adına 1 saylı məktəbdə qeydə alınıb. Görüntülər məktəbin riyaziyyat müəllimi Babayeva Nailə Ağaməmməd qızının dərs dediyi 6a sinifində qeydə alınıb. Yevlax rayon təhsil şöbəsi olaraq müəllimlə söhbət aparılıb və ondan məsələ ilə bağlı izahat alınıb.
Ümidvar Mamedovun sözlərinə görə məktəbdə indiyədək bənzər hadisə müşahidə olunmayıb.
“Nailə Babayeva bildirib ki, bu addımı dini təbliğ etmək üçün yox, şagirdlərə təhsildən əlavə maraqlı məlumatlar öyrətmək məqsədilə atıb. Müəllim haqqında müəyyən tədbirlər görüləcək”.
Məsələ ilə bağlı Yevlax şəhər Sahib Əliyev adına 1 saylı tam orta məktəblə əlaqə saxladıq. Bir neçə cəhddən sonra zənglərimizə cavab verilsə də məktəb kollektivi suallarımızı cavablandırmaqdan boyun qaçırdı. Belə ki, ya telefonları söndürdülər, ya da ümumiyyətlə nə direktorun, nə də müəllimlərin telefon işlətmədiklərini bildirdilər.
Təhsil Nazirliyi isə...
Təhsil Nazirliyinin mətbuat katibi Cəsarət Valehov Ednews-a açıqlamasında məsələdən xəbədar olduqlarını və faktın araşdırıldığını bildirib.
“Hazırda məktəblərdə baş verənlər insanı dəhşətə gətirir. Bura təhsil ocağıdır, kiminsə məqsədinə xidmət edən məkan deyil. Bu gün məktəblərimiz müəyyən dini cərəyan və qruplaşmaların oyuncağına çevrilib. Bu, onu göstərir ki, təhsili idarə edənlər məktəbləri özbaşına buraxıb. Bir tərəfdən repititorlar, digər tərəfdən kurslar, o bir tərəfdən isə dini cərəyanlar uşaqları dartıb aparır. Ümid edirəm ki, uşaqları öz istəklərinə qurban verənlər ciddi cəzalandırılacaqlar”.
Qeyd edək ki, Azərbaycan Respublikası Konstitusiyasının 18-ci bəndinin üçüncü hissəsində, Azərbaycan Respublikasında dövlət təhsil sisteminin dünyəvi xarakter daşıması öz əksini tapıb.
Ləman Abbaslı