Yaz-yay aylarında günəş şüalarına daha çox məruz qalırıq. Günəş vannalarının orqanizm üçün faydalarından hər kəs xəbərdardır. Lakin mütəxəssislərin fikrincə, dərimizin sağlamlığı üçün bacardığımız qədər günəş şüalarından qorunmalıyıq.
Bəs yayın qızmar günəşindən dərimizi necə qoruya bilərik?
Bununla bağlı Ednews-a danışan həkim-dermataoloq Fərhad Qarayev bildirib ki, günəş şüasının insan dərisinə heç bir müsbət təsiri yoxdur.
“Günəş şüası insanların dərisinin qocalmasına səbəb olur. Kollegenləri parçalayır, elastikliyin itirilməsinə və qırışların yaranmasına səbəb olur”.
Həmçinin dermatoloq günəş şüasının dəridə xərgənç riskini də artırdığını bildirib.
“Günəş şüaları piqment dəyişimləri yaradır. Bəd xassəli törəmələrin əmələ gəlməsi üçün şərait hazırlayır. Bu, yaşlı insanlara daha çox təsir edir”.
Fərhad Qarayev yay aylarında çimərliyə gedən insanları günəşdən bacardıqları qədər qorunmağa çağırıb.
“İnsanların bacardıqca səhər tezdən günorta 12-ə qədər və axşam saat 6-7 arası çimərliyə getmələri məsləhətdir. Həmçinin, çimərlikdə çətir altında dincəlmək daha yaxşı olar, bu zaman dəri birbaşa günəş şüasına məruz qalmaz”.
Dermatoloq günəş şüasının D vitamini sintez etməsinə də toxunaraq bildirib ki, günəşdən alınan D vitamini orqanizm üçün yetərli sayılmır.
“Azərbaycan günəşli bir ölkədir. Lakin əhalinin 80% D vitamini azlığından əziyyət çəkir. Bu da o deməkdir ki günəş heç də düşündüyümüz kimi bizi D vitamini ilə təmin etmir.”
Sonda Fərhad Qarayev insanları dərilərinin sağlamlığı üçün günəş şüalarından bacardıqları qədər uzaq durmağa çağırıb.
Aliyə İlyas