Son zamanlar bir sıra media subyektləri tərəfindən intihar halları ilə bağlı xəbərlərin geniş tirajlanması, xüsusən də yetkinlik yaşına çatmayan şəxslərin özünə qəsd etməsi gündəmin ən aktual məsələlərindəndir. Bu kimi mövzuları işləyərkən jurnalist peşəkarlığı baxımından yol verilən qüsurlar cəmiyyətdə narahatlıq yaratmaqla, haqlı olaraq ictimai narazılığa səbəb olur. Məsələ ilə bağlı Azərbaycan Respublikasının Medianın İnkişafı Agentliyinin intihar hallarının işıqlandırılması ilə bağlı açıqlaması yayımlanıb. 

 

Beynəlxalq Avrasiya Mətbuat Fondunun Prezidenti Umud Mirzəyev Medianın İnkişafı Agentliyi-nin açıqlamasına münasibət bildirib. 

 

“Son zamanlar cəmiyyəti ən çox narahat edən mövzulardan biri də intihar hadisələridir və bir-birinin ardınca baş verən bu hallar artmaqda davam edir. Bəzən yeniyetmələr hansısa bir uğursuzluğun nəticəsi olaraq “çıxış yolunu” intihar etməkdə görür. Burada şəxsin özünün psixoloji durumu və valideyn faktoru önəmli rol oynayır. Xüsusən də, gənc analar ailədaxili münaqişələr və ya maddi çətinliklərdən yaranan səbəblərdən dolayı intihara meyl edirlər”. 

 

O, KİV-i bu kimi məsələlərə həssas yanaşmağa çağırıb.

 

“Hadisələrin işıqlandırılmasında KİV-in rolu danılmazdır. Əfsuslar olsun ki, bu cür faktlar bizim mediada bəzən bilərəkdən və ya bilməyərəkdən arzuolunmayan tərzdə, qeyri-peşəkarcasına, jurnalist etikasına zidd şəkildə təbliğ edilir”. 

 

Umud Mirzəyev həmçinin bu xəbərlərdən sui-istifadə hallarına da toxunub.

 

“Reytinq qazanmaq üçün ucuz üsullara əl ataraq bu cür xəbərləri uyğunsuz başlıqlarla tirajlayırlar. Hətta həmin xəbərlər sosial mediada reklamlara qoyulur və daha çox insana çatdırılmasına şərait yaradılır. Düşünürəm ki, belə hallarda emosiyalara qapılmaq olmaz. Bu xəbərlər elə təqdim edilməlidir ki, insanlar belə hadisələrin örnək olmadığını dərk edərək bu kimi neqativ halların təsirinə düşməkdən yayınsınlar”. 

 

BAMF prezidenti media subyektlərinin cəmiyyətin tolerant, dözümlü olması üçün öz dəstəyini əsirgəməməli olduğunu da vurğulayıb.

 

“Günümüzdə internet resurslarından istifadənin hər kəs tərəfindən əlçatan olduğunu  nəzərə alsaq, onlayn mediamız xüsusən bu məsələlərdə daha ciddi və diqqətli olmalıdır. Bu səbəbdən düşünürəm ki, bu gün yayımlanan Medianın İnkişafı Agentliyinin açıqlaması media subyektləri tərəfindən ciddi şəkildə dəyərləndirilməlidir.”

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary