Pandemiya səbəbilə tətbiq olunan qapanmalar aradan qalxsa da, son zamanlar yoluxma sayında kəskin artım müşahidə olunur. Yoluxanların sayı isə hər gün durmadan artır.

Bəs yoluxma hallarının çoxalmasına səbəb nədir?  

Dünya səhiyyə nümyəndələrinin isə proseslərin axışına öz baxış bucaqları var. 

Məsələ ilə bağlı həkim infeksionist Sadiqə Əliyeva Ednews-a açıqlaması zamanı bildirib ki, əsas səbəb insanların yay fəslində daha çox yaxından təmas etmələridir. 

“İstirahət zamanı hər kəs bir- biri ilə sıx təmasda olduğu üçün yoluxma sayı artır. Həmçinin buna mutasiyaya uğrayan ştamlar da səbəb olur. Hər bir virusun mutansiyaya uğramaq xüsusiyyəti var və COVİD-19 virusu da bu xassəyə malikdir. Virus mutansiyaya uğradıqca yeni ştamlar əmələ gəlir və digərinə nisbətən daha yoluxdurucu olma xüsusiyyəti güclənir. Ancaq, yoluxduruculuq artdıqca xəstəliyin ağır keçməsi azalır. Yəni hazırda ambulator müalicə olunan xəstələr daha çoxdur, nəinki stasionar. Bir çox xəstələr virusu evdə adi qrip infeksiyası kimi keçirir”.  

Maraqlıdır, indiki şəraitdə tibbi maskadan istifadə lazımdırmı? Sadiqə Əliyevanın fikrincə hazırki vəziyyət maskadan istifadəni tələb edir. 

“Kimisi özünü qorumaq üçün kimisi başqasına virusu keçirməmək üçün tibbi maskadan istifadə edir. Ancaq hazırki vəziyyətdə insanların sıx olduğu, qapalı məkanlarda maskadan istifadə arzuolunandır. Çünki biz yanımızdakı şəxsin virusa yoluxub yoluxmağını dəqiq bilə bilmərik. Mənim fikrimcə, hər ehtimala qarşı özümüzü qorumaq üçün maskadan istifadə etməliyik”.

Diqqət etməli olduğumuz məqamları vurğulayan infeksionist qoruma tədbirlərindən də danışıb.

“Hər zaman olduğu kimi sosial məsafənin qorumaq, gigeyana qaydalarına riayət etmək və şəxsi gigiyenaya fikir vermək lazımdır. Bundan əlavə dezinfeksiya vasitəsi kimi spirtdən istifadə olunmalıdır”.

Ləman Abbaslı