Hazırda ən aktual məsələ sosial şəbəkələrdə səslənən təhqirlərdir. Bir qisim insanlar bunun qanunla tənzimlənməsini daha məqsədə uyğun sayır. Demək olar ki, dünyanın aparıcı dövlətləri sosial şəbəkələri tənzimləmək üçün qanunlar qəbul edirlər.
Azərbaycanda bu necə tənzimlənir?
Hüquqşünas Əsabəli Mustafayev Ednews-a açıqlaması zamanı bildirib ki, belə bir qanun var, yenidən sosial şəbəkələrlə bağlı qanun tənzimlənməsinə ehtiyyac yoxdur.
“Belə qanun var və bir şəxs sosial şəbəkədə kim tərəfindənsə təhqir olunursa şəxsi ləyaqətin alçaldılması, böhtan, təhqirlə bağlı məhkəməyə müraciət edib, hüquqlarını müdafiə edə bilər. Yaxud sosial şəbəkədə qanunsuz sahibkarlıqla məşğul olursa o da cinayət məsuliyyətinə cəlb olunur. Artıq yenidən belə bir qanun və ya tənzimlənmənin olması təkrarlanmadır. Heç bir əhəmiyyəti yoxdur. Çünki hər yeni qanun məhdudlaşdırma deməkdir. Qanun sayının çoxluğu nizam-intizamın yaradılması deyil. Bundansa mövcud qanunların işlək olmasına üstünlük vermək lazımdı".
Hüquqşünasın dediyinə görə belə qanun söz azadlığını məhdudlaşdırır.
“Bu sosial şəbəkədən az adamın istifadəsi və fikir azadlığının məhdudiyyətidir. Bilinmir ki, harada söz azadlığı başlayır, harada böhtan başlayır. Elə buna görə də fikir azadlığına diqqət yetirilməlidir. Fərdi şəxslər tərəfindən şəxsi fikri təhqir kimi qiymətləndirirlər. Ancaq bu sosial şəbəkənin nizamlanmamasından irəli gəlmir”.
Bəs Əsabəli Mustafayevin fikrincə sosial şəbəkədə özbaşınalığın qarşısını almaq üçün nə kimi tədbirlər görülməlidir?
“Bilgilərin az olması insanlararasında belə hallara gətirib çıxarır. Mənim fikrimcə insanlara qanunun sərt olması təsir etməz, ondansa ictimaiyyəti maarifləndirmək daha münasibdir. Bu işləri də peşəkar jurnalistlər apara bilər. İctimaiyyətə bildirməlidirlər ki, sosial şəbəkə var, tənqid var, ancaq şəxsi həyat da var. İnsanların şəxsi həyatı, ləyaqəti var və onlara toxunmaq olmaz. Nəticədə həmin şəxsin cinayətə cəlb edilməsi haqqında maarifləndirmək lazımdır, yoxsa tənzimlənmə və sərt qaydalar gərəksizdir”.
Ləman Abbaslı