Son zamanlar sosial şəbəkələrdə insanların şəxsi həyatı ilə bağlı əsasən paylaşılan intim görüntülər ciddi müzakirələrə səbəb olub. Xüsusilə bu videolarda insanların açıq şəkildə nümayiş etdirilməsi birbaşa fərqli rəylər formalaşdırır.

Mövzu ilə bağlı danışan hüquq müdafiəçisi Sahib Məmmədov Ednews-a açıqlamasında bildirib ki, baş verənlər qanunla tənzimlənərsə, bu şəxsi həyata müdaxilə hesab edilə bilər.

“Həm Konstitusiyanın 32-ci maddəsi, həm də insan hüquqlar və azadlıqlarına dair Avropa İnsan Hüquqları Konvensiyasının 8-ci maddəsinə görə bu addım şəxsi həyata müdaxilə hesab edilir. Bu eyni zamanda, şəxsi həyat və ya mənzil toxunulmazlığı hüququnun pozulmasıdır. 

Yeri gəlmişkən, Avropa qanunlarına görə hər bir vətəndaşın iş yeri, maşının içərisi və şəxsi kabinetində əşyalarının şəxsi toxunulmazlığı təmin olunmalıdır. Məhz elə bu səbəbdən belə hadisələr şəxsi həyata müdaxilə sayılır”.

Ekspert, həmçinin qeyd edib ki, bu cür görüntüləri yayan şəxslr həm də mülki qaydada məsuliyyətə cəlb oluna və ya ona qarşı məhkəmə davası açıla bilər.  

“Əvvəla qanunvericiliyə əsasən bu videonu və fotoları yayan şəxsə qarşı mülki müstəvidə iddia qaldırmaq olar. Məsələn, əgər şikayət edən şəxsə qarşı böhtan və təhqir elementləri varsa, bu cinayət məsuliyyəti yarada bilər. Bir sözlə, bunu edən şəxsə qarşı mülki qayda da ittiham irəli sürmək olar”.

Sosioloq Əhməd Qəşəmoğlunun fikrincə isə bu cür paylaşımın həm müsbət, həm də mənfi tərəfi var: 

“Bu cür videolar sayəsində insanlar özlərinə çəki-düzən verir və məsuliyyət hiss edir. Mənfi tərəf isə insan haqlarının pozulmasıdır. Gərək insanlar həyatlarında utanacağı bir hərəkət etməsinlər ki, nə vaxtsa bu ona qarşı istifadə olunsun. Bu cür videoları görən cəmiyyət də bundan dərs almalıdır. Eyni zamanda, bizlər də gərək çalışaq ki, yeni nəslimizin əxlaq və tərbiyyəsinin qeydinə qalıb, bu cür hərəkətlərin üzə çıxmasının qarşısını alaq",- deyə, ekspert fikrini tamamlayıb.

Rəna Mürşüd