“Bolt” və “Uber” şirkətlərinin özbaşınalığının qarşısı alınmalıdır - Nəqliyyat eksperti - ednews.net

2 Oktyabr,

(+994 50) 229-39-11

“Bolt” və “Uber” şirkətlərinin özbaşınalığının qarşısı alınmalıdır - Nəqliyyat eksperti

Cəmiyyət A- A A+
“Bolt” və “Uber” ökəmizdə ən çox istifadə olunan taksi xidməti şirkətləri olsa da, istər müştərilərin, istərsə də orada çalışan sürücülərin zaman-zaman narazılıqlarını eşidirik. Sürücülər sahibkar tərəfindən istismar olunduqlarını iddia edərkən müştərilər də xidmət keyfiyyətinin aşağı olmasından  şikayət edir.
 
Müştərilər iddia edir ki, əksər hallarda həmin sürücülər şəhəri tanımırlar, kondisioneri yandırmaq, yaxud musiqinin səsini azaltmaq xahişləri az qala aqressiya ilə qarşılanır, avtomobili idarə edərkən votsapla yazışırlar, maşını təmiz saxlamırlar, yol qaydalarına məhəl qoymurlar və ən acınacaqlı məqam, bəzi hallarda sürücü konkret olaraq hansısa narkotik vasitəsinin təsiri altında olur. 
 
Bəs onlar sürücü kimi işə necə qəbul olunurlar? 
 
Təkliflərdən biri də budur ki, əvvəllər olduğu kimi taksoparkda marşruta çıxanlar yoxlanılsın, maşınların təmizliyinə və texniki vəziyətinə nəzarət edilsin, sürücülər şəhəri tanımaq üzrə imtahan versinlər və s. Eyni zamanda, sürücülərin hüquqları qorunsun, onların istirahət günləri müəyyən edilsin. Çünki ölkədə baş verən bir çox yol qəzalarının səbəbi də məhz sürücülərin yorğun olmasıdır.  
 
Mövzu ilə bağlı Ednews-a danışan nəqliyyat eksperti Elməddin Muradlı bildirib ki, Azərbaycanda kifayət qədər nüfuzlu, öz işinə məsuliyyətlə və ciddi yanaşan taksi şirkətləri var. 
 
“Lakin Bolt” və “Uber” Azərbaycana daxil olandan sonra onların bir çoxu müflis oldu, bir çoxu məcburən fəaliyyətini dayandırdı. Onlar baha olsa da, keyfiyyətli fəaliyyət göstərirdilər. Bu gün “189” taksi xidməti normal sürücülərlə əməkdaşlıq edir. Ondan istifadə edən sərnişinlərin əksər hallarda narazılığı olmur, çünki ekonom klass, orta sinif, VİP avtomobillər təqdim olunur və müştərilər ona uyğun seçim edirlər. Sürücü qeyd olunan əraziyə vaxtında çatır, sürücülər sərnişinlərlə əlbəyaxa olmur”.
 
 
Ekspertin sözlərinə görə, sürücünü qıcıqlandıran məqam qiymətlərin ucuz olmasıdır.
 
“Sürücü sərnişini götürmək üçün təyin olunan əraziyə maşın sürəndə artıq bilir ki, ona 3 manat 20 qəpik pul veriləcək. Sifarişi yerinə yetirərkən sürücü də sərnişin də narahat olur. “Bolt” və “Uber” şirkəti Azərbaycana daxil olandan xaos yaradıblar. Göstərdikləri xidmətin qiymətini nə qədər ucuzlaşdırsalar da bunun cəmiyyətimizə heç bir faydası yoxdur, istifadə edən də narazıdır, sürücü də.
 
Xidmət belə təşkil edilməməlidir. Düşünürəm ki, bu sahədə artıq nizam-intizam yaradılmalıdır. Sürücülərin iş və istirahət rejimləri olmalıdır. Onlar işə götürülərkən narkotester və alkotesterdən keçirilməli, sağlamlıq arayışı, psixoloji vəziyyəti haqında sənədlər təqdim olumalı və bunlar etibarlı tibb məntəqələri tərəfindən verilməlidir. İndi poliklinikalar 50 manata arayış satır. Bu halda isə  heç bir nəticə əldə olunmayacaq”. 
 
E. Muradlı qeyd edib ki, taksi fəaliyyəti geniş və spesifik bir sahə olmaqla xüsusi yanaşma tələb edir. 
 
“Ölkədə taksi parkları azdır. Parkı olanlar da məcburən “Uber” və “Bolt”un təsiri altındadır və onlarla işləmək məcburiyyətindədir. Müştərilər bəzən “189”a da qoşulurlar. Elə insanlar var ki, deyingən sürücü istəmir, yaxşı pul verir, yaxşı da sürücü tələb edir, keyfiyyətli, komfortlu maşın tələb edir. Demirəm ki, indiki qiymətlər fantastik dərəcədə artmalıdır.
 
Amma nəzərə almaq lazımdır ki, bu gün yanacağın, ərzaq məhsullarının, ehtiyat hissələrinin və ümumiyyətlə hər şeyin qiyməti bahalaşır, amma taksinin qiyməti ucuzlaşır. Açıq-aşkar görürük ki, burda süni ucuzlaşma prosesi gedir. Bunu da “Bolt” və “Uber” edir. Bu şirkətlər Azərbaycanda özbaşınalıqla məşğul olur, bunun qarşısı alınmalıdır”.
 
Gülnar Səlimova 


Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...