“Bakı Metropoliteni”ndə insan sıxlığının azalması səbəbilə yay rejiminə keçildikdən sonra qatarların hərəkət intervalları uzadıldı. Lakin metro istifadəçilərinin sözlərinə görə günün pik saatlarında intervalı azaltmaq da fayda var. Belə ki, pik vaxtda bəzən qatarlar stansiyaya beş dəqiqə intervalla gəlir. Bu da öz növbəsində qatarlarda sıxlığın yaranmasında səbəb olur. gəlir ki, bu zaman da basabas yaranır. Həmçinin bildirilir ki, yeni qatarlarda qapılar açılıb-bağlanan zaman kondisioner sistemi gec işə düşdüyü üçün içəridə istidən soyuq hava kütləsinə sərt keçid yaranır. Bəzi qatarlarda isə soyutma sistemi ya yoxdur ya da işləmir.
Məsələ ilə bağlı “Bakı Metropoliteni” QSC-nin mətbuat xidmətinin rəhbəri Bəxtiyar Məmmədov Ednews-a danışarkən bildirib ki, qatarlar yay qrafikinə keçsə də günün müxtəlif saatlarında monitorinqlər aparılır, onun nəticələri hər gün müzakirə olunur.
“Bunun üçün ehtiyat qatarları nəzərdə tutulub və zərurət yarananda hamısı xəttə buraxılır. Səhər saat 07:00-dən axşam saat 21:00-a qədər “28 May-Həzi Aslanov” istiqamətində interval iki dəqiqə yarımdır, hətta daha az. Bu isə o deməkdir ki, ehtiyat qatarlar hal-hazırda müntəzəm olaraq xəttə çıxırlar”.
“Bakı Metropoliteni”nin sözçüsü həmçinin bidirib ki, qış qrafikinə keçilməsi ilə bağlı məsələlər artıq avqustun əvvəlindən diqqətdə saxlanılır.
“Sərnişin sıxlığı ilə bağlı da ayrıca monitorinqlər aparılır. İyul ayı ilə müqayisədə sərnişin sayında əsaslı bir artım yoxdur. Gün ərzində insanların axın istiqaməti üzrə hərəkətinin dəyişməsindən asılı olaraq sıxlıq dəyişə bilir. Axşam monitorinqində analoji sıxlıq olan “20 Yanvar”, “Memar Əcəmi”, “Elmlər Akademiyası”, “İnşaatşılar” istiqamətlərinin hər birinin özünəməxsus xüsusiyyəti nəzərə alınır”.
O, qatarlarda quraşdırılan kondisioner sistemindən danışarkən bildirib ki, hər yay mövsümündə belə müraciətlər olur.
“Biz hər dəfə sərnişinlərimizə müraciətlər edirik ki, ilk növbədə isti, narahatlıq hiss edəndə sərnişin-maşinist düyməsinə basaraq maşinistə məlumat versinlər. Kondisioner mikroiqlim nəzarəti sistemi avtomatik olduğu üçün havanın hərarətini özü tənzimləyir. Qatar stansiyada dayananda salona isti hava kütləsi daxil olur və sərnişin salonunda balans pozulur. Sərnişinlər qatara çox minib-düşəndə da bu əlavə olaraq istilik miqdarını və göstəricilərini dəyişir. Avtomatik system dərhal deyil, mərhələ ilə yavaş-yavaş dəyişir. İki dəqiqədən bir qatar artıq növbəti stansiyaya çatana yaxın sərinlik hiss olunur.
Belə olduqda maşinistə müraciət edilir. O həmin sistemə dəyişiklik edir və bir müddətdən sonra avtomatik rejimə qaytarır”.
Mətbuat katibi sonda sərnişinlərdən zərurət olmadığı halda kondisionerli qatarlarda əlavə müdaxilələr və maşinistə yerli-yersiz müraciətlər etməməyi xahiş edib.
“Maşinistin bunu yoxlamaq imkanı da yoxdur. O, sərnişinləri idarə edir və təhlükəsiz daşınmasına məsuliyyət daşıyır”.
Gülnar Səlimova