Argentinada naməlum yoluxucu xəstəlik yayılıb. Məlumata görə, yayılan mənşəyi məlum olmayan virusun pnevmoniyaya bənzər olduğu qeyd edilib. Şəhərdə altı nəfər virusa yoluxub. Artıq yoluxucu virusdan bir nəfər dünyasını dəyişib, qalanlarının vəziyyəti isə ağır dəyərləndirilir.

Mütəxəssislər araşdırma aparsalar da hələ ki, xəstəliyin səbəbi və mənşəyi haqqında bir məlumat yoxdur. Çünki hər xəstədən müxtəlif bakteriyalara qarşı götürülən testlər neqativ nəticələr verib.

Ümumiyyətlə hər il olduğu kimi payız mövsümünün gəlişi ilə yoluxucu viruslarda artım müşahidə olunur. Ümumi statistikaya nəzər salsaq, koronavirus pandemiyasında da yayılma həddi yüksəlib.

Mütəxəssislər bu virusların məhz payız aylarında artmasında yay mövsümünün bitməsi ilə əlaqədar insan orqanizmində əsasən immun sisteminin zəifləməsi ilə əlaqələndirirlər.

Mövzu ilə bağlı Ednews-a danışan həkim-infeksionist Nicat Əzimli açıqlamasında bildirib ki, payız fəslində yoluxucu xəstəliklərin artımı təbii hesab olunur: “Havanın soyuması nəticəsində insanların daha çox qapalı yerlərdə toplaşmasını deyə bilərik. Digər səbəblərdən biri də odur ki, mövsümün dəyişməsilə meyvə-tərəvəzlər təbiətdən birbaşa əldə olunmur, bu da insanların immun sisteminə mənfi təsir göstərir. İnsanların kifayət qədər hərəkət etməməsi də immun sisteminə birbaşa təsir edir.

Bu viruslardan qorunmaq üçün  qapalı yerlərdə maskadan istifadə etmək, gigiyena qaydalarına riayət etmək, hər 6 aydan bir vaksinasiya prosesindən keçmək vacibdir. Qeyd edək ki, insan orqanizmində homeostaz normal olduqda, insan xəstəliklərə daha yaxşı müqavimət göstərə bilər”.