Ekspertlər tədris ilinin başlaması ilə əlaqədar şəhərdəki tıxaclar barədə həyacan siqnalı veriblər. Onların fikrincə, onsuz da dolu olan küçə və prospektlər sentyabrın 15-dən sonra daha da dolub daşacaq. Hazırda nəqliyyatın hərkətində böyük sıxlıq var, məktəblər, ali təhsil müəssisələri açıldıqdan sonra isə bu özünü daha da qabarıq formada biruzə verəcək.
Bəs, bu problemin həlli üçün hansı tədbirlər görülür?
Məsələ ilə bağlı Bakı Şəhər Baş Polis İdarəsinin Dövlət Yol Polisi (DYP) İdarəsinin baş inspektoru, polis mayoru Araz Əsgərli Ednews-a açıqlamasında bildirib ki, paytaxtda yaşamağın üstünlüklərindən istifadə edən hər bir vətəndaşımız buradakı real vəziyyəti düzgün qiymətləndirməlidir:
"Kimsə sıxlıqların qarşısının tam alınacağını hesab edir. Amma bu, mümkün olan reallıq deyil. Məsuliyyətli davranış tərzi isə bir çox məsələni həll edə bilər. Məsələn, sürücü gedəcəyi yolu və dayanacağı nöqtəni əvvəlcədən qiymətləndirmirsə, başqalarını düşünmədən özünün iş yerinin və ya övladının məktəbinin qarşısında yolun ortasında hərəkəti iflic edirsə və bu hərəkətlərinə min bir bəhanə ilə haqq qazandırmağa çalışırsa təbii ki, problemlər də qaçılmaz olaraq qalacaq”.
DYP rəsmisi Respublika ərazisində 1 milyon 700 minə yaxın avtomobil parkının olduğunu da qeyd edib. Onun sözlərinə görə, avtomobillərin 70%-i paytaxtda idarə olunur.
“Əlavə olaraq, gündəlik regionlardan paytaxta şəxsi məqsədlərlə səfər edən insanların da sayını nəzərə alsaq, bu kifayət qədər ciddi göstəricidir. Bakı şəhəri ərazisində yay mövsümünün bitməsi, iş sezonun açılması, yeni tədris ilinin başlaması sıxlıqları qaçılmaz edəcək. Polis bəs bunun üçün nə edə bilər? Bu cür sualları, adətən, polisə ünvanlayırlar, amma bu sualı polisə ünvanlamaq bir qədər sadəlövhlükdür. Biz onsuz da xidmətimizi gücləndirilmiş formada, xüsusi plan üzrə təşkil edəcəyik. Amma heç kimə də deyə bilmərik ki, şəxsi avtomobiliniz ilə küçəyə çıxmayın. Ən yaxşı halda insanları qaydalara riayət etməyi tövsiyə edə bilərik. Tıxacların qarşısını almaq üçün aidiyyəti dövlət orqanları planlı formada hərəkət etməlidir. Məqsədimiz cəmiyyətə düzgün təbliğat aparmaq və məsuliyyət hissinin mahiyyətini çatdırmaqdır. Qaydalara düzgün əməl etməyin hamının həyat tərzini rahatlaşdırdığını, təhlükəsizliyin qorunması üçün əsas şərt olduğunu unutmamalıyıq”.
Tıxaclardan can qurtarmağın daha bir yolu isə metropolitendir. Bəzi şəhər sakinləri şəxsi avtomobillərindən imtina edərək metroya üstünlük verir. Lakin metroda vəziyyət daha da çətin olur. İnsanların sıxlığı daha çox məhz burada yaşanır.
Metro yeni tədris ilinə necə hazırdır?
“Avqust ayından başlayaraq Bakı Metropoliteni bütün monitorinqlərin istiqamətini məhz yeni tədris mövsümünün başlamasına uyğun qurub”.
Bu sözləri Bakı Metropoliteninin Mətbuat Xidmətinin rəhbəri Bəxtiyar Məmmədov bildirib. Onun sözlərinə görə, stansiyalarda metropoliten infrastrukturunda təbii ki, bütün işlər məhz buna uyğun olaraq planlaşdırılıb.
“Sərnişin axının və sıxlığının ilkin variantları hesablanır. Yaxın bir həftə ərzində bu işlər tamamlanacaq və bu barədə ictimaiyyətə əlavə məlumatlar veriləcək. Xüsusilə qeyd edim ki, ilk növbədə qatarların hərəkət qrafikində müvafiq dəyişikliklər ediləcək. Bununla bağlı işlər sürətlə aparılır. Bundan əlavə olaraq təbii ki, sərnişin sıxlığı müəyyənləşdirilərək, eskalatorların fəaliyyətində müvafiq tənzimləmələr həyata keçiriləcək. Avqust ayı ilə müqayisədə Bakı Metropoliteninin sərnişin daşıması sentyabrın əvvəlinə görə bir o qədər artmayıb. Artıq sentyabrın növbəti həftəsində sərnişin sıxlığı qismən artmağa başlayacaq. Sentyabrın 15-dən etibarən metropoliten tam olaraq yeni istiqamətdə fəaliyyətini quracaq”.
Qeyd edək ki, bu tendensiya avtobuslarda da bir çox problemlərə yol açacaq. Avtobusların paytaxt küçələrində saatlarla tıxacda qalması isə bir ayrı dərddir.
Bakı Nəqliyyat Agentliyinin Mətbuat Xidmətinin rəhbəri Mais Ağayev tıxaclarda avtobusların hərəkət mexanizmindən danışıb. Qurumun mətbuat katibi qeyd edib ki, tələbatın artacağını nəzərə alınaraq daha öncədən qabaqlayıcı tədbirlər görülüb.
“Gündəlik xəttə çıxarılan avtobus sayının və onlar arasında interval sərnişin axınına uyğun tənzimlənməli, eləcə də, tələbat olan xətlər üzrə avtobus sayı artırılacaq. Sərnişindaşımaların düzgün və səmərəli icra olunması üçün sərnişinlərə ,o cümlədən fərdi avtomobil sürücülərinə anlayışlı olmağı, yol hərəkəti qaydalarına xüsusən də dayanma, durma və parklanma qaydalarına ciddi əməl etməyi tövsiyə edirik. Övladlarını şəxsi nəqliyyat vasitəsi ilə məktəbə aparan valideynlərdən xahiş edirik ki, təhsil müəssisələrinin ətrafında avtomobillərini qadağan olunan yerdə park edib digər hərəkət iştirakçılarına maneə yaratmasınlar. Bundan başqa şəhər sakinlərini mümkün qədər şəxsi nəqliyyat vasitələrindən istifadə etməməyə və ictimai nəqliyyata üstünlük verməyə çağırırıq”.