Oktyabrın 14-də “Hilton” otelində Beynəlxalq Avrasiya Mətbuat Fondunun 30 illik yubileyi ilə bağlı tədbir keçirilib.
Ednews xəbər verir ki, tədbirdə BMT-nin ölkə üzrə resident əlaqələndiricisinin əvəzi Quido Ambroso çıxış edib. O, BAMF-ı yubiley münasibətilə təbrik edərək bunları söyləyib:
“Bu gün Beynəlxalq Avrasiya Mətbuat Fondunun 30 illik yubileyi münasibətilə keçirilən tədbirdə BMT-nin rezident əlaqələndiricisi xanım Vladanka Andreevanın adından çıxış etdiyim üçün çox şadam.
Cənab, Umud Mirzəyevi və onun komandasını son 30 ildə icma inkişafı, media və vətəndaş cəmiyyətinin inkişafı, minalarla mübarizə sahələrində, eləcə də qaçqınlar və məcburi köçkünlərin üzləşdiyi problemlərin həllində gördüyü peşəkar işlərə görə səmimi qəlbdən təbrik edirəm.
BMT-nin İqtisadi Sosial Şurasının (ECOSOC) xüsusi məşvərətçi üzvü olan BAMF BMT-nin Azərbaycandakı agentlikləri ilə fəal əməkdaşlıq edir və BMT tərəfindən çağırılan beynəlxalq konfranslarda iştirak edir”.
Q.Ambroso BAMF-ın layihələrindən də söz açıb. O qeyd edib ki, BAMF hazırda BMT-nin Qaçqınlar üzrə Agentliyi ilə Minalara Qarşı Maarifləndirmə layihəsinin həyata keçirilməsində əməkdaşlıq edir.
“Layihə 200 məcburi köçkün icması fəalı və dövlət işçisi, o cümlədən səhiyyə, təhsil və digər dövlət xidmətlərinin məsul işçiləri üçün Partlayıcı Sursatlar Riskinin Maarifləndirilməsi üzrə xüsusi təlimlər keçir, onlara Azərbaycandakı məcburi köçkün icmaları daxilində maarifləndirmə sessiyaları və məlumatların yayılmasını təşkil etməyə imkan verir. Bu tədbirlər Ağcabədi, Ağdam, Tərtər və Goranboy rayonlarında məskunlaşan 25 minə qədər məcburi köçkünə yönəlib”.
BMT nümayəndəsi çıxışına davam edərək dedi ki, BAMF həmçinin BMT-nin Uşaq Fondunun (UNICEF) dəstəyi ilə bir sıra layihələr həyata keçirib.
“UNICEF-in BAMF ilə birgə partlayıcı sursat riski ilə bağlı maarifləndirmə proqramı müxtəlif fəaliyyətlər vasitəsilə uşaqların, ailələrin və icmaların təhsilinə töhfə verib. Fond 50 icmanı əhatə edən altı münaqişədən təsirlənmiş rayonlarda da müvafiq proqramı həyata keçirir. 50.000-dən çox yerli əhali, o cümlədən 12.000-dən çox uşaq, ictimaiyyətin iştirakı ilə partlayıcı sursat riski ilə bağlı maarrifləniblər.
BAMF ilə əməkdaşlıq BMT-nin yerli vətəndaş cəmiyyəti təşkilatları ilə tərəfdaşlığının gözəl nümunələrindən biridir. 1945-ci ildə yarandığı gündən bəri Birləşmiş Millətlər Təşkilatı QHT-lərlə fəal şəkildə məşğul olur və təşkilatın ideallarını inkişaf etdirməyin vacibliyini dərk edir.
Cənab Mirzəyev, BMT-nin Azərbaycandakı Ölkə Qrupu adından sizi və komandanızı təşkilatınızın 30 illik yubileyi münasibətilə təbrik etmək istərdim. Biz Azərbaycanda 2030-cu il Gündəliyinin irəliləyişi üzrə gələcək tərəfdaşlığımızı səbirsizliklə gözləyirik”.