Xəbər verdiyimiz kimi, oktyabrın 14-də Bakıda Beynəlxalq Avrasiya Mətbuat Fondunun (BAMF) 30 illik yubileyi münasibətilə tədbir keçirilib.
Ednews xəbər verir ki, tədbirdə BAMF-ın Müşahidə Şurasının sədri Çingiz Abdullayev, Azərbaycan Respublikası Prezidentinin Administrasiyasının Qeyri-hökumət təşkilatları ilə iş və kommunikasiya şöbəsinin müdir müavini Səadət Yusifova, Beynəlxalq Türk Mədəniyyəti və İrsi Fondunun prezidenti Günay Əfəndiyeva, Ailə, Qadın və Uşaq Problemləri üzrə Dövlət Komitəsinin sədri Bahar Muradova, Azərbaycan Respublikasının Minatəmizləmə Agentliyinin (ANAMA) İdarə Heyətinin sədri Vüqar Süleymanov, Azərbaycan Respublikasının Qeyri-Hökumət Təşkilatlarına Dövlət Dəstəyi Agentliyinin icraçı direktoru Aygün Əliyeva çıxış ediblər.
Tədbirdə Vüqar Süleymanov BAMF-ı 30 illik yubiley münasibətilə təbrik edib. O, çıxışında bunları deyib:
“Böyük təcrübəyə malik Beynəlxalq Avrasiya Mətbuat Fondu Azərbaycanın haqq səsinin dünyaya çatdırılmasında, mina təhlükəsi ilə mübarizə proqramlarında fəal iştirak edib. Mina təhlükəsi ilə mübarizə sahəsində BAMF-la 2002-ci ildən başlayan əməkdaşlıq bu gün də davam edir. BAMF minalardan zərər çəkənlərin ehtiyaclarının öyrənilməsində, minaların sosial-iqtisadi mənfi təsirinin tədqiqatında, maarifləndirmədə və minatəmizləmə fəaliyyətinin həyata keçirilməsində əhəmiyyətli işlər yerinə yetirib. Azərbaycanın üzləşdiyi mina probleminin dünyaya çatdırılmasında dövlət-vətəndaş cəmiyyətinin birgə fəaliyyəti mühüm əhəmiyyət kəsb edir”.
Xatırladaq ki, Beynəlxalq Avrasiya Mətbuat Fondunun yaradılmasının 30 ili tamam olur. Fond 1992-ci ildə müstəqil qeyri-hökumət təşkilatı kimi yaradılıb, Azərbaycanda QHT-lər haqqında qanuna uyğun olaraq dövlət qeydiyyatından keçib.