Azərbaycan Dövlət Pedaqoji Universitetinin rektoru, professor Cəfər Cəfərov Beynəlxalq Avrasiya Mətbuat Fondunun 30 illik yubileyi ilə bağlı təbrik edib.
Ednews təbrik mətnini təqdim edir.
“Qurucusu və rəhbəri olduğunuz Beynəlxalq Avrasiya Mətbuat Fondunun (BAMF) 30 yaşı tamam olur. Əlamətdar yubiley münasibətilə sizi və Fondun əməkdaşlarını Azərbaycan Dövlət Pedaqoji Universitetinin çoxminli kollektivi adından səmimi-qəlbdən təbrik edirəm.
Bu gün BAMF zəngin beynəlxalq təcrübəsinə, ciddi və nüfuzlu tərəfdaşlarına, səriştəli kadr potensialına, maddi-texniki bazasına görə yalnız Azərbaycanda deyil, region miqyasında tanınmış qeyri-hökumət təşkilatlarından birinə çevrilib. Fondun BMT-nin İqtisadi və Sosial Şurasına məşvərətçi statuslu üzv seçilməsi, Rusiyada və Baltikyanı respublikalarda şöbələrini, dünyanın bir sıra ölkələrində təmsilçiliklərini formalaşdırması onun fəaliyyət dairəsinin genişliyi haqqında aydın təsəvvür yaradır.
BAMF ötən dövr ərzində Azərbaycanda vətəndaş cəmiyyətinin formalaşmasında və inkişafında, QHT-dövlət münasibətlərinin şəffaf məcraya yönəlməsində, Qarabağ münaqişəsi və bütövlükdə ölkəmiz haqqında obyektiv informasiyanın beynəlxalq aləmə çatdırılmasında yaxından iştirak etmişdir.
Təqdirəlayiq haldır ki, rəhbərlik etdiyiniz qurum medianın və digər vətəndaş cəmiyyəti təsisatlarının dəstəklənməsi, qaçqınların və məcburi köçkünlərin problemlərinin həlli, erməni işğalının nəticələrinin aradan qaldırılması yönündə müvafiq dövlət orqanları ilə sıx və səmərəli əməkdaşlıq edərək, yüksək potensiala malik qeyri-hökumət təşkilatı kimi ölkənin ümumi inkişafına öz töhfəsini verməyə çalışır.
Hörmətli Umud müəllim,
ADPU nəzdində fəaliyyət göstərən İctimai Şuranın sədri kimi universitetimizdə tədris və təlim-tərbiyə prosesinin təkmilləşdirilməsi, şəffaflığın artırılması yönündə aparılan işlərə göstərdiyiniz dəstəyə görə sizə şəxsən təşəkkürümü bildirirəm.
Bir daha sizi və rəhbərlik etdiyiniz kollektivi BAMF-ın 30 illik yubileyi münasibətilə ürəkdən təbrik edir, nəcib və xeyirxah fəaliyyətinizdə yeni uğurlar arzulayıram”.
Qeyd edək ki, BAMF-ın 30 illiyi ilə əlaqədar təbrik məktubları gəlməkdə davam edir.