Son zamanlar taksi xidmətlərindən olan şikayətlərin ardı-arası kəsilmir. Artıq bu məsələ sosial şəbəkələrdə geniş müzakirə olunan mövzulardan biri halına çevrilib. Ödəniş haqqını nağd şəkildə tələb edən, sərnişinlə xoşagəlməz rəftar edən, əlavə ödəniş tələb etməyə çalışan, məqsədlərinə çatmayanda kobud münasibət göstərməyə çalışan sürücülərin sayı da az deyil.
Bu kimi məsələlərdə sərnişinlər hansı orqana müraciət etməlidirlər? Sözügedən taksi sürücülərini hansı cəzalar gözləyə bilər?
Ednews bu barədə nəqliyyat eksperti və hüquqşünasdan münasibət öyrənib. Cavabları təqdim edirik:
Nəqliyyat eksperti Eldəniz Cəfərov bildirib ki, Azərbaycanda taksi xidmətini iki qurum tənzimləyir. Bakı Nəqliyyat Agentliyi və Yerüstü Nəqliyyat Agentliyi həyata keçirir.
“Taksi sürücüləri tərəfindən hüquqları pozulan vətəndaşlar bir neçə quruma müraciət edə bilərlər. Birincisi, Antiinhisar və İstehlak Bazarına Nəzarət Dövlət Xidmətinə yazılı qaydada və yaxud qaynar xəttə zəng edərək müraciət edə bilərlər. Eyni zamanda həmin sürücünün çalışdığı taksi şirkətinə də şikayət edilməlidir”.
Hüquqşünas Şamil Paşayev qeyd etdi ki, hazırda Azərbaycanda taksilərin böyük bir hissəsi “Bolt” və “Uber” şirkətlərinə məxsusdur.
“Bu şirkətlər sürücülərlə əmək müqaviləsi bağlamır. Bu Azərbaycan Respublikasının Əmək Məcəlləsinə və tələblərinə ziddir. Əmək Məcəlləsinin 7-ci maddəsində göstərilir ki, xidməti müqavilə ilə sürücülərin fəaliyyəti yolverilməzdir. Bu kimi şirkətlərdə taksi fəaliyyəti əsas peşədir. Əsas peşə olduğuna görə onlar sürücülərlə xidməti müqavilə deyil, əmək müqaviləsi bağlamalıdırlar. Xidməti müqavilə bağlandığına görə bir çox ciddi qayda pozuntuları ilə qarşılaşa bilirik. Bəzən sürücülər gediş haqlarının ödənmə prosesində, müştərilərlə davranış qaydalarında ciddi qayda pozuntusu yaradırlar. Belə olduqda vətəndaşlar məhkəməyə müraciət edə, taksi xidmətinin tabe olduğu şirkətdən təzminat ala bilərlər. Vətəndaşlar şirkətə müraciət edərək həmin sürücünün taksi fəaliyyətinin qadağan edilməsi ilə bağlı şikayət edə bilərlər.”
Ayan Rzayeva
