İslam Əməkdaşlıq Təşkilatı Gənclər Forumu, Avrasiya Regional Mərkəzinin (İƏGF Avrasiya Regional Mərkəzi) təşəbbüsü ilə bu ilin 20-27 noyabr tarixlərində “Show Me Azerbaijan” (Mənə Azərbaycanı göstər) layihəsi çərçivəsində bir qrup xarici bloqerin ölkəmizə səfəri planlaşdırılır.
Ednews xəbər verir ki, ABŞ, Fransa, Rusiya, İspaniya, İndoneziya, Qazaxıstan, Türkiyə, Misir və ümumilikdə sayı 10-dan çox ölkəni təmsil edəcək bloqerlər Şuşa, eləcə də İsmayıllı və Şəki şəhərlərinə səfər edəcəklər.
Səfərin əsas məqsədlərindən biri Azərbaycan Respublikası prezidentinin bu ilin “Şuşa ili” elan edilməsi ilə əlaqədar bu şəhərə ediləcək səfər çərçivəsində (Show Me Azerbaijan - Beynəlxalq bloqerlərin Şuşa düşərgəsi) xarici bloqerləri Qarabağın təbiəti, mədəni abidələri və tarixi yerləri, xüsusilə, Şuşanın Azərbaycana aid olmasını sübut edən mədəni irsi, o cümlədən, erməni işğalının nəticəsi kimi yaşayış və mədəni abidələrin vandalizmə məruz qalması, eyni zamanda bu şəhər işğaldan azad edildikdən sonra həyata keçirilən bərpa və yenidənqurma işləri ilə tanış etmək, sonucda onların səfər təəssüratlarını dünyaya yaymaqdır.
Şuşa səfərində xarici ölkələri təmsil edən tanınmış bloqerlərə iki gün ərzində təlim keçiriləcəyi planlaşdırılır. Səfərin digər məqsədi isə Azərbaycanın görməli təbiət yerlərini və tarixi abidələrini dünyaya tanıtmaqdır.
Qeyd etmək lazımdır ki, İƏGF Avrasiya Regional Mərkəzinin təşəbbüsü ilə keçən illər ərzində analoji tədbirlər uğurla həyata keçirilib.
Belə ki, “Show Me Azerbaijan” layihəsi çərçivəsində 8 ölkədən 13 bloqer, o cümlədən, ABŞ və Əlcəzairdən olan 3 tanınmış videobloqer işğaldan azad edilmiş ərazilərə səfər edərək, erməni işğalı nəticəsində dağıdılmış yaşayış məskənləri, tarixi abidələr haqda hazırladıqları videoreportajları yutub kanallarında yayımlayıblar.
Bu reportajlara yeddi milyondan çox insan baxıb. Bu ilin sonuna qədər Qarabağla bağlı bloqerlərin çəkdiyi videoreportajların və onlara baxış sayının artırılması layihənin əsas məqsədlərindən biridir.
.jpg)
