Azərbaycan Hökumətinin təşəbbüsü və Minatəmizləmə Agentliyininin (ANAMA) təşkilatçılığı ilə “Mina Təhlükəsi ilə Mübarizə: çağırışlar və imkanlar” mövzusunda 3 günlük beynəlxalq tədbir keçirilir.
Ednews xəbər verir ki, tədbiri Azərbaycan Respublikasının Minatəmizləmə Agentliyinin (ANAMA) İdarə Heyətinin sədri Vüqar Süleymanov açaraq qonaqları salamlayıb. O, qeyd edib ki, tədbir ilk olaraq minatəmizləmə sahəsində istifadə olunan yenilikçi metodların tətbiqi imkanlarını araşdırmaqla, “minasız həyat” çağırışlarına dəstək göstərmək, humanitar minatəmizləmə sahəsində Azərbaycanın təşəbbüslərinə töhvə vermək məqsədi ilə həyata keçirilir.
“Bu gün də mina və müharibə qalıqları dünyanın bir çox bölgəsində sülhə, insanların həyat və sağlamlığına, inkişafına və tərəqqisinə ən ciddi təhdid və maneələrdən biri olaraq qalır. Təbii ki, bu cür, qlobal miqyasda mövcud olan problem məhz qlobal səviyyədə səylərin birləşdirilməsi, müxtəlif metodologiyaların və üsulların tətbiqini şərtləndirir.
Bu tədbir bizim üçün həm əməkdaşlıq, həm də bölüşmə, öyrənmə və inkişaf üçün xüsusi önəm daşıyır. Azərbaycan hökumətinin təşəbbüsü ilə, Azərbaycan Respublikasının Minatəmizləmə Agentliyinin təşkilatçılığı ilə ərsəyə gələn bu tədbirə dünyanın 28 ölkəsindən, 60-dan yuxarı iştirakçı qatılıb. Dünyanın müxtəlif yerlərindən videoformatda qoşulan iştirakçılar da var. Düşünürük ki, mina problemi ilə bağlı qlobal gündəlikdə dayanan çağırışlar və imkanların səmərəli müzakirəsi mina təhlükəsi ilə mübarizədə faydalı və keyfiyyətli həllərin tətbiqi üçün önəmli olacaq”.
Vüqar Süleymanov bildirib ki, Azərbaycan Qarabağ bölgəsi mina və partlamamış hərbi sursatlar ilə çirklənmə səviyyəsinə görə dünyada ilk pillələrdə yer alır.
“Dünən Ağdam şəhərinə səfər edən tədbir iştirakçılarının və xarici mütəxəssislərin problemin miqyası ilə əyani – daha yaxından tanış olmaq imkanı olmuşdur. Problemin miqyasına uyğun olaraq, minatəmizləmə fəaliyyəti post-münaqişə dövründə Azərbaycan dövləti üçün xüsusi prioritetlərdən biri kimi müəyyən edilmişdir. Məsələ daim Azərbaycan Respublikası Prezidentinin xüsusi diqqətindədir və bu istiqamətdə fasiləsiz işlər görülür. Xüsusilə, post-münaqişə dövründə aparılan bərpa və quruculuq işləri fonunda ANAMA-nın texniki imkanları, insan resursları və əməliyyat metodları da xeyli inkişaf etdirilir. Azərbaycan Respublikası Prezidentinin göstərişlərinə uyğun olaraq Azərbaycanda minatəmizləmə fəaliyyətinin həm mahiyyətcə, həm də məzmunca yeni bir mərhələsinə keçid istiqamətində önəmli addımlar atılır”.
Sədr həmçinin tədbir iştirakçılarına Azərbaycanın işğaldan azad olunmuş ərazilərində bu günə qədər təmizlənən minalardan da məlumat verib.
“Minaları yerləşdirmək asan, onları təmizləmək isə qat-qat çətindir. 10 noyabr 2020-ci ildən bu günədək Azərbaycanın işğaldan azad olunmuş ərazilərində 59.055 min hektar ərazi təmizlənib, 76.810 min mina və partlamamış hərbi sursat zərərsizləşdirib. Bunlardan 13.211 mini tank əleyhinə mina, 26.899 mini piyada əleyhinə mina, 36.700 mini isə partlamamış hərbi sursatlar olub. Təəssüflər olsun ki, 2-ci Qarabağ müharibəsindən keçən dövr ərzində 268 nəfər mina partlayışından zərər çəkib, onlardan 44 nəfəri həyatını itirib”.
Çıxışının sonunda Vüqar Süleymanov qeyd edib ki, Azərbaycan 2030-cu ilədək Milli Prioritetləri sırasında azad edilmiş ərazilərin bərpası və bu ərazilərə təhlükəsiz həyatın qaytarılması əsas strateji hədəflərdən biri kimi müəyyən edib.
“Bu baxımdan beynəlxalq minatəmizləmə qurumlarının potensial imkanlarının öyrənilməsi, təcrübə və nəticələrin dəyərləndirilməsi, habelə, minatəmizləmə əməliyyatları zamanı yaranan çətinliklərin aradan qaldırılmasında yeni yanaşmaların tətbiqi, keyfiyyətli və səmərəli nəticələrin əldə olunması və mümkün əməkdaşlıq imkanları ANAMA -nın əsas diqqət etdiyi sahələrdəndir”.
Qeyd edək ki, tədbir noyabrın 16-dan 18-dək davam edəcək.