Yunan mənşəli olan Pedofiliya sözü "uşaq" və "sevgi" sözlərinin birləşməsindən yaransa da, digər bir deyimlə uşaqbazlıq mənasını verir. Yəni, yetkinlik yaşında olan, həddi-büluğa çatmamış 4-11 yaşlı uşaqlara qarşı seksual maraqlar pedofiliya adlanır. 

“Pedofil bir insan bir ailəni məhv etmiş, bir insanın arzularını mənəvi cəhətdən öldürmüş bir qatildir”- bu sözləri sosioloq Elçin Bayramlı, Ednews-a açıqlaması zamanı bildirib.

“Əslində bu mövzuları sosioloqlar, psixoloqlar müzakirə etsə də, kütləni maraqlandıran mövzular isə tamam fərqlidir. Cəmiyyətin aparıcı qüvvələri sayılan media, qeyri hökümət təşkilatları, deputatlar və hökümət nümayəndələri bu məsələləri qaldıraraq, həlli yolunu tapmalıdırlar”.

Sosioloqun sözlərinə görə, bu cinayəti törədənlərə ağır cəzalar tətbiq edilməli və onlar ciddi nəzarət altına alınmalıdır. 

“Onlara yüngül cəzalar verərək, bu cür halların yenidən yaranmasına gətirib çıxarır”.

Elçin Bayramlı, digər ölkələrdə bu cür halların qarşısının hansı cəzalarla alınması haqqında da danışıb. 

”Bəzi ölkələrdə bu cinayəti törədənlərə ya ömürlük həbs və ya həmin insan üzərində kimyəvi axtalanma prossesi aparılır. Düşünürəm ki, bu cür cəza bizdə də tətbiq olunsa, bu cür halların qarşısı alınar”. 

E.Bayramlı, həmçinin qeyd edib ki, sahə həkimləri tərəfindən bu cür xəstəliyə meyilli olan şəxslər ciddi nəzarətə götürülməlidir. Onlaq mütəmadi olaraq psixiatr, psixoloq müayinəsindən keçməlidir.

“Digər nəzarət isə ailələrin övladları üzərində olmalıdır. Düşünürəm ki, bir insan belə bir halla üzləşdikdə, qonşular dərhal polisə şikayət etməli, mediaya çatdırılmalı, onlar isə bu haqda yazmalıdırlar. Bu problemin yarısı sosial məsuliyyət hesab edilir. Cəmiyyət təşkilatları bu mövzunu nəzərdə saxlamalı, ictimailəşdirməli və xüsusi layihələr həyata keçirməlidir. Daha sonra yuxarıda qeyd etdiyim kimi ağır cəzalar, bizim qanunlara daxil edilməlidir”.

Mövzu ilə bağlı danışan psixoloq Tariyel Farizoğlu, pedofiliyanın 2 əsas hissəyə ayrıldığını bildirib. 

“1-cisi yetişkin insanların uşaqlara qarşı cinsi zorakılıq tətbiq etməsi, 2-cisi isə yetkinlik yaşına çatmamış 2 fərdin bir-birinə göstərdiyi seksual zorakılıq etməsidir. Hər ikisinə də psixoloji anlamda fərqli yanaşmaq lazımdır”. 

Psixoloq birinci məsələni ölkəmizdə aktual olan erkən evliliklə müqayisə edib. O, bildirib ki, bu evliliklər də pedofilzmlə əlaqəlidir.

“Təəssüflər olsun ki, Azərbaycanda pedofilzm "erkən evlilik" adı altında cəmiyyətimiz tərəfindən dəstəklənir. Bu halda günahkar təkcə pedofil yox, bu "evliliyə" tərəf olanlar da günahkar sayılmış olur. Bunu aradan qaldırmaq üçün, uşaqları psixoloji maarifləndirmək lazımdır. Yetkinlik yaşına çatmamış bir qızın "ərə verərək" cinsi istismara buraxılması, həmin ailəni, nəsli və cəmiyyəti cəzalandıra bilmədiyimizə görə, yeganə yol maarifləndirməkdən keçir”.

O, bu halın evlilik yox, fərdi şəkildə baş verməsini, artıq şəxsi psixi pozuntunun olması kimi adlandırıb. Mütəxəssis həmin adamı ciddi nəzarətə almaq, psixiatrik müayinəyə aparmaq və cəmiyyətdən təcrid olması barədə də fikir söyləyib.

Tariyel Farizoğlu, pedofilliyin 2-ci halından danışarkən, bildirib ki, yetişkin olmayan iki insan arasında bu hal yaşanarsa, bu zaman valideynlərlə ciddi işlər aparmalıdır. O, həmçinin vurğulayıb ki, buna səbəb olaraq, indiki dövrün uşaqlarının yüksək informasiya təzyiqinə məruz qalması və informasiya zəhərlənməsi yaşanmasıdır.

“Psixoloji olaraq yetişkin olmasalar belə, fizioloji olaraq bu istək nəzarət altına alınmadığı zaman, insan zorakılığı aktiv hala gətirilmiş olur. Ailələrin uşaqları ilə olan münasibəti klassik üslubda deyil, müasir cəmiyyətin tələbi üzərindən formalışdırılmalıdır. Biz, bir dövlət olaraq, bu problemin üzərində dayanmasaq, bu hallar təkrarlanacaq”.

Son olaraq, psixoloq cinsi istismara məruz qalan uşağın psixoloji reabilitasiyadan keçməsinin vacibliyini də bildirib.

“Ola bilsin azyaşlı bu zaman fizioloji zədələnmə yaşamasa da, onun psixoloji sarsıntı keçirməsi qaçınılmazdır. Ömrünün sonuna qədər bu sarsıntı ilə yaşamasın deyə, uşağın peşəkar psixoloji dəstək alması mütləqdir. Valideynlər belə halla rastlaşdıqda, bunu gizlətməməli, əksinə dəstək olmalıdır. Əks halda, yaşadığı travma onun gələcəkdəki həyatına, sağlam həyat yaşaması və qurmasına ciddi maneələr törədəcək”.

Rəna Mürşüd