ABŞ-da keçirilən beynəlxalq festivalda Azərbaycanın mina problemi müzakirə olunub - FOTOLAR - ednews.net

8 Fevral, Çərşənbə

(+994 50) 229-39-11

ABŞ-da keçirilən beynəlxalq festivalda Azərbaycanın mina problemi müzakirə olunub - FOTOLAR

Cəmiyyət A- A A+

2022-ci il 2-3 dekabr tarixlərində ABŞ-ın Napa Vadisində dünyanın aparıcı təşkilatlarından olan “Sülhün Kökləri” tərəfindən “Sülh üçün çağırış festivalı” (The Festival of the Bells for Peace) keçirilib.

Ednews xəbər verir ki, tədbirdə Azərbaycan Respublikasının ABŞ-da fövqəladə və səlahiyyətli səfiri Xəzər İbrahim, Azərbaycan Respublikasının Minatəmizləmə Agentliyinin (ANAMA) Beynəlxalq əlaqələr, maarifləndirmə və mətbuatla iş idarəsinin rəisi Ramil Əzizov və Beynəlxalq Avrasiya Mətbuat Fondunun Prezidenti, ANAMA yanında İctimai Şuranın sədri Umud Mirzəyev Azərbaycanı təmsil edərək panel müzakirələrdə iştirak ediblər.

“Sülh üçün çağırış festivalı” təhlükəli ərazilərin minalardan təmizlənməsi və müharibənin təsirinə məruz qalmış bölgələrin yenidənqurulması və bərpası üçün yardım vəsaitinin toplanmasına həsr olunan beynəlxalq tədbirdir.

Açılış nitqi ilə çıxış edən “Sülhün Kökləri” humanitar təşkilatının təsisçisi və rəhbəri Heidi Kuhn dünyanın 30 ölkəsində 30 milyondan çox minanın basdırıldığını və bunun insanların təhlükəsiz yaşam şəraitinə ciddi şəkildə təsir göstərdiyini vurğulayıb. Həmçinin, Azərbaycan ərazilərinin kütləvi şəkildə minalanmasına toxunub. Bildirib ki, cari ilin mart ayında BAMF-ın dəvəti və ANAMA-nın dəstəyi ilə ölkəmizə səfər çərçivəsində işğaldan azad olunmuş ərazilərə baş çəkib, minalarla yüksək səviyyədə çirklənmənin öz gözləri ilə görüb və beynəlxalq ictimayyyətə bu sahədə dəstək verməyə çağırış edib.

Çıxışdan sonra Heidi Kuhnün Qarabağa səfərini, təəssüraftlarını, minaların törətdiyi amansız və acı reallığı, gələcək nəsillərin təhlükəsizliyi naminə minalanmış sahələri üzüm bağları ilə əvəz etmək üçün birgə əməkdaşlığa çağırışını əks etdirən BAMF tərəfindən hazırlanan video çarx təqdim edilib.  

Birinci paneldə çıxış edən spikerlər diplomat Kenet Quin, səfir Xəzər İbrahim, Ramil Əzizov və Rotari klub nümayəndəsi Sehab Elavar Azərbaycanın mina problemi və onun həllinə beynəlxalq dəstək istiqamətində müzakirələr aparıblar.

Birinci panel müzakirələrdə çıxış edən Azərbaycan nümayəndə heyəti işğaldan azad edilmiş ərazilərin minalarla çirklənmə səviyyəsinə görə dünyada ilk üçlükdə yer aldığını və hazırki hesablamalara görə işğaldan azad edilmiş ərazilərdə 1,5 milyondan çox minanın basdırıldığını qeyd edib. Mövcud mina probleminin icra edilən bərpa və yenidənqurma işlərinə, keçmiş məcburi köçkünlərin öz torpaqlarına qayıdışına ciddi maneə olduğunu, eləcə də regionda sabitlik və davamlı sülhün təmini sahəsində beynəlxalq resursların cəlb olunmasının əhəmiyyətini vurğulayıb. Həmçinin, mina qurbanlarının sayı və Agentlik tərəfindən mina təhlükəsi ilə mübarizə istiqamətində həyata keçirilən fəaliyyət barədə məlumat verib.

Tədbir ABŞ, Kolumbiya, Yaponiya, Ukrayna, Belarusiya, Xorvatiya, Livan və Laosdan iştirak edən müvafiq nümayəndələrin mina təhlükəsi, minaların törətdiyi fəsadlarla bağlı çıxışları ilə davam edib.

“Sülh üçün Minalardan Üzümlüklərə qlobal çağırış” adlı festivalda Azərbaycan nümayəndə heyəti tərəfindən Qarabağda “Minalardan Üzümlüklərə” layihəsinin icrasına başlanılması ilə bağlı qlobal çağırış edilib. Festival çərçivəsində ANAMA-nın fəaliyyətini, BAMF-ın icra etdiyi humanitar işləri, eləcə də Azərbaycanın tarixini, mədəniyyətini əks etdirən çap materiallarından ibarət stend iştirak edən nümayəndələrin marağını cəlb edib.

Qeyd edək ki, “Sülhün Kökləri” humanitar təşkilatının təsisçisi və rəhbəri Heidi Kuhnün bütün dünyada minaların məhv edilməsi, mina sahələrinin üzüm və meyvə bağlarına çevirmək təşəbbüsü milyonlarla insanın həyatına təsir edib. Müharibə zonalarında sülh toxumları səpmək məqsədilə başladılan “Mines to Vines” ideyası bu gün dünyanın müxtəlif ölkələrində uğurla həyata keçirilir.

İki gün davam edən tədbirin əsas media dəstəkçisi olan ABŞ-ın nüfuzlu ABC7 kanalı mütəmadi olaraq canlı yayımlar, müsahibələr və xüsusi reportajlar yayımlayıb. 

1

1

1

1

1



Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...