Xəbər verdiyimiz kimi, millət vəkili Nigar Arpadari çıxışında bildirdib ki, velosipedin məhz nəqliyyat vasitəsi kimi istifadəsi hər mənada sərfəlidir - ekoloji cəhətdən təmizdir, insanların sağlamlığına müsbət təsir göstərir, infrastrukturu ucuz başa gəlir, tıxacların və hərəkət sıxlığının aradan qaldırılması üçün də ən effektiv alternativlərdən biridir.
Maraqlıdır ki, velosipedlərə xüsusi nişanların verilməsi nə dərəcədə düzgündür?
Nəqliyyat eksperti Elməddin Muradlı Ednews-a açıqlamasında bildirib ki, velosiped sürücülərinə hər hansı xüsusi nişan verilməsi kimi məsələlər real görünmür.
“Çünki biz bu gün hələ mopedlərlə bağlı məsələni həll etməmişik. Skuterlərin hərəkəti ilə bağlı qanunvericilikdə hər hansı tənzimləmə yoxdur. Təsəvvür edin ki, skuter sürücüsü hər hansı qayda pozarsa həmin şəxsə piyada kimi cəza yazılır. Amma, nəzərə almaq lazımdır ki, həmin şəxslər də nəqliyyat vasitəsi idarə edir. Amma mühərrikli velosipedlər istisna olmaqla velosipedlər insan əzələsi ilə hərəkətə gəlir. Bəziləri isə mühərrik vasitəsi ilə çalışır. Moped məsələsi qala-qala, velosipedlərə fərqləndirmə nişanı verməyə ehtiyac yoxdur. Onlara sadəcə yol şəraiti yaratmaq lazımdır. Əgər velosiped sürücüləri üçün hər hansı xüsusi zolaqlar yaradılarsa, onlarla bağlı təbliğat xarakterli işlər görülsə daha faydalı olar. İnsanları velosiped sürməyə çağırmaq lazımdır. Bunun üçün də ilk növbədə şərait yaratmaq lazımdır”.
O həmçinin qeyd edib ki, velosipedçilərin təkmilləşdirilməsi, onların hansı yollardan istifadə edəcəyini təyin etmək lazımdır. Birinci, bu məsələ barədə düşünməlidirlər”.
Ayan Rzayeva