Son günlər bəzi şəxslər tərəfindən “Nar Mobile” abunəçilərinə bir sıra mesajlar gəlir. Belə ki, onlara hazırda sahib olduqları nömrəni satmağa çalışırlar. Abunəçi nömrənin özünə aid olduğunu qeyd edəndə isə bildirirlər ki, texniki səhv nəticəsində yanlış şəxslə əlaqə saxlayıblar. Maraqlıdır ki, bu şəxslər istifadəçilərin data bazasını necə əldə edirlər?
Satışı təklif edən nömrələrdən biri ilə əlaqə saxladıq onlar isə cavabında sistemdə problem olduğunu bildirdilər.
Ednews məsələ ilə bağlı Nar mobile şirkətinin mətbuat xidməti və İT mütəxəssisi ilə əlaqə yaradıb.
Nar mobile şirkətinin mətbuat xidmətindən bildirildi ki, mobil nömrələrin satışı “Nar” mərkəzlərində, rəsmi diler mağazalarında və esim.nar.az saytında həyata keçirilir. Müxtəlif messencerlər və sosial şəbəkələr vasitəsilə nömrə satışı xidməti mobil operator tərəfindən həyata keçirilmir. “Nar” nömrələrini yalnız rəsmi satış kanallarından əldə etmək tövsiyə edilir.
İT mütəxəssisi Fərrux Rəcəbli açıqlamasında qeyd etdi ki,bu gün bir çox qurumlar öz işçilərini işdən çıxardıqları zaman onun şirkətlə bağlantılarını kəsmirlər. Şirkət daxilində ona aid olan informasiyalar məlumat bazalarından silinmir.
“Mənim tanıdığım şirkətlər var ki, eyni bu qaydada fəaliyyət göstərirlər. İşçi neçə aydır ki, işdən ayrılıb amma hələ də elektron poçt ünvanı işləyir və yaxud rəqəmsal platformalarda giriş məlumatları hələ də aktivdir. Bir çox hallarda işçilər buradan ayrıldıqdan sonra kənardan həmin resurslara yenidən daxil olma imkanı tapırlar. Bu gün 99% mobil aksesuar satış mağazalarında operatorlar öz nömrələrini tədqim edərək müştəriləri həmin mağazalara satış üçün dəvət edirlər. Guya nömrələrə baxmaq adı ilə gəlirlər, amma həmin jurnalda satılmış nömrələri qeyd edirlər. İnsanlar da qarşı tərəfin mobil operator olduğunu düşünürlər. Amma hər bir mobil operatorda yoxlama kodu var. Həmin kod vasitəsi ilə nömrənin kimə aid olduğunu yoxlaya bilirlər. Şahidi olmuşam ki, nömrə mənə aid olduğu halda zəng vurub deyirlər ki, bu nömrə başqa şəxsə aiddir. Deyirlər şəxsiyyət vəsiqənizi göndərin nömrəni sizin adınıza keçirdək. Müştəri xidmətlərinə yaxınlaşmaq şərti ilə razılaşdım. Belə olduğu halda görüşə gəlmədilər. Belə saxtakarlar hazırda çoxdur”.
Mütəxəssin sözlərinə görə, insanlar nömrənin öz adına olub-olmadığını yoxlamaq üçün həmin şəxslərdən hansı kodu daxil etmələrini soruşmalıdırlar. Bütün rəsmi mobil opertorlarda bu xidmət mövcuddur. Həmin kodu daxil etdikdə bu nömrə kimə məxsusdursa həmin şəxsin məlumatlarını sizə bildiriş vasitəsi ilə gəlir.
O, həmçinin qeyd edib ki, əgər məsələdə hər hansı bir pul mənimsənilməsi saxtakarlıq varsa birbaşa hüquq mühafizə orqanlarına müraciət edilməlidir.
Ayan Rzayeva
