Son zamanlar metroda yaşanan sıxlıq əhaliyə böyük çətinlik yaradır. Ekspertlərin fikrincə, bu sıxlığı aradan qaldırmaq üçün alternativ nəqliyyat vasitələri fəaliyyətə başlamalıdır. Onların fikrincə, məsələn İstanbul şəhərində olan metrobus sistemi Azərbaycanda da tətbiq olunmalıdır. Bundan başqa trolleybus və tramvaylar da öz fəaliyyətlərinə davam etsələr metroda yaşanan sıxlıq müəyyən dərəcədə həll oluna bilər.
Məsələ ilə bağlı Ednews-a danışan nəqliyyat məsələləri üzrə ekspert Elməddin Muradlı bildirib ki, Azərbaycanda 2019-2023-cü illəri əhatə edən Yol Hərəkəti Təhlükəsizliyinə dair Dövlət Proqramı var.
“Bu proqramda göstərilib ki, Azərbaycanda alternativ nəqliyyat vasitələrinin yaradılması müzakirə olunsun, araşdırılsın. Bu yaxınlarda da, Bakının Baş Planı təsdiqlənib. Bu plandan görünür ki, 2040-cı ilə qədər Bakının yol şəbəkəsinin təxminən 30%-i tramvayla əhatə olunacaq. Məsələyə bu gün qərar verib, sabah icra etmək mümkün deyil. Çünki Azərbaycanın nəqliyyat sahəsindəki problemlər illərlə süni şəkildə yaradılmış problemlərdir. Tramvay şəbəkəsinin qurulması 18 il vaxt tələb edəcək”.
Ekspert həmçinin şəhərdə yeni nəqliyyat növünün - metrobus yollarının qurulmasından da söz açıb. O, bu sistemin qurulmasını daha məqsədəuyğun sayıb.
“Elektrikli avtobusları konkret olaraq xüsusi zolaqlarla hərəkətə buraxmaqla effektini görmək mümkündür. Bu yaxınlarda Xaliq Faiqoğlu şirkəti Bakı-Sumqayıt arasında elektrikli avtobuslar, bir növ metrobus funksiyasını yerinə yetirən nəqliyyat vasitələrinin xəttə buraxılmasını təklif edib. Çıxış yolumuz alternativ nəqliyyat vasitələrinin yaradılması olsa da, bu sahədə peşəkarların işinə ehtiyac var. Yol heç kimin şəxsi mülkü deyil. Əsas dövlətin marağıdır"
Nəzrin Eldarqızı