Son zamanlarda taksidən istifadə edən sərnişinlərin narazılıqları səngimək bilmir. Şikayətçilər müxtəlif səbəblərdən sürücülərdən narazıdırlar. Ancaq sosial şəbəkələrdə ən çox şikayət mövzusu taksi sürücülərin qeyri-etik davranışlarıdır.

Belə ki, taksi sürücülərinin xoşagəlməz davranışları, yüksək səslə musiqi dinləməsi, ən əsası da şəxsi həyatla bağlı suallar verməsi etik cəhətdən heç də düzgün qəbul edilmir. Bu sərnişinlərdə böyük narahatlıq hissi yaradır. 

Məsələ ilə bağlı Ednews-a danışan sosioloq Lalə Mehralı bu məsələnin sosial şəbəkələrdə də qabardıldığını və insanların taksi sürücülərindən şikayət etdiyini vurğulayıb:

“Şikayətçilər bəzi taksi sürücülərinin sərnişinlərin özəl həyatı ilə marağlandığını bildirirlər. Hesab edirəm ki, bu cür situasiyalarda aqresiv olmaq lazım deyil. Gün ərzində sükan arxasında olan sürücülər danışmaq və sosiallaşmaq ehtiyacı duyurlar. Amma bu o demək deyil ki, avtomobildə sərnişinə şəxsi suallar ünvanlasınlar. Belə suallar etik qaydalara ziddir. Bu hal baş verdiyi zaman yüngül formada xəbərdarlıq etmək lazımdır. Əks halda taksi sürücüləri günün yarıdan çoxunu işlədikləri üçün səhhətində, xüsusilə də yuxu və sinir sistemində problemlərə səbəb olur”.

Sosioloq yorğun insanların taksi sürücüsü kimi fəaliyyət göstərməsinin çox təhlükəli olduğunu da bildirib:

“Qanuna görə də belə sürücülərin sükan arxasında olması qadağandır. Sürücü özələ müdaxilə etməmək şərti ilə sərnişinlərlə söhbət edə bilərlər. Amma danışmaq meyli olan sərnişinlərlə söhbət məqsədəuyğundur, amma danışmağa meyil etməyən sərnişinlərlə söhbət etmək düzgün deyil. Hesab edirəm ki, şirkətlər öz sürücülərinə bununla bağlı təlimlər keçməlidir”.

Nəqliyyat üzrə ekspert Eldəniz Cəfərov da məsələ ilə bağlı fikirlərini Ednews-la bölüşüb: 

“ Məncə biz belə adamlara taksi sürücüsü yox, sadəcə “vicdansız insanlar” desək daha yaxşı olar. Taksi sahəsindəki liberal vəziyyətdən, əlçatanlıqdan istifadə edən sürücülər çoxdur. Bu səbəbdən də bu gün müxtəlif cinayətkar əməlləri törədən insanlar da bu fəaliyyətlə məşğuldurlar. Bunların arasında narkokuryerlər, oğrular da var ki, taksi fəaliyyəti adı altında öz qanuna zidd işlərini həyata keçirilər”.

Ekspert Daxili İşlər Nazirliyinin belə şəxslərə qarşı daha ciddi tədbirlər görməli olduğunu deyib:

“ Son vaxtlar ərzində mütəmadi olaraq reydlər keçirilir ki, onların sayı artırılmalıdır. Vətəndaşlarımız özləri də belə hallarla rastlaşdıqları zaman dərhan DİN-in 102 qaynar xəttinə zəng etməlidirlər. Vətəndaşlar bu hallarla bağlı ərtaflarındakı insanlara danışsalar da, aidiyyatı qruplara şikayət etmirlər. Belə olan halda da müvafiq qurumlar əllərində sübut olmadığına görə tədbir görməkdə çətinlik çəkirlər”.

E.Cəfərov bu cür hallarla üzləşən vətəndaşlara müraciət edərək onları anında şikayət etməyə çağırıb:

“ Biz bütün vətəndaşlara tövsiyyə edirik ki, taksi xidməti adı altında kriminal əməllər törədən, xüsusilə də qadınlara söz atan, nalayiq hərəkətlər sərgiləyən şəxslərlə bağlı dərhal qurumlara müraciət etsinlər. Lazım gəldikdə hətta şikayət ərizəsi yazsınlar. Bugün yazılmayan hər bir şikayət ərizəsi gələcəkdə törədilən bir cinayətdir”.

Nəzrin Eldarqızı