Dənizkənarı bulvar ərazisinin bir hissəsinə daxil olmaq ödənişlidir. Bu ərazi Bayraq meydanına yaxın olan və şəhərin bir-sıra restoranlarının yeləşdiyi məkandır. Şlaqbaunla bağlanan bu ərazidə pullu dayanacaq olsa da, restoranlara gələn qonaqları gətirən taksi sürücüləri üçün də  daxil olmaq ödənişlidir. Bu isə taksi sürücülərin və şəxsi avtomobili olmayan insanların haqlı şikayətlərinə səbəb olub. Sosial şəbəkələrdə qeyd olunan şikayətlərə görə, əraziyə müştərini aparan taksi sürücüləri də əlavə olaraq ödəniş etmək məcburiyyətində qalır.

“Qanunvericilikdə nəzərdə tutulduğu kimi  15 dəqiqə giriş-çıxış üçün vaxt verilməlidir.  Ticarət mərkəzlərində, bulvarda , hava limanında və s.  kimi yerlərdə taksilərin giriş- çıxışı sərbəst olmalıdır”. 

 Bu sözləri sözügedən məsələ ilə bağlı  Nəqliyyat eksperti Elməddin Muradlı Ednews-a açılamasında bildirib. 

 “Ola bilər ki, həmin yerlərdə  kimsə öz yaxınını yanına çağırır.  Bundan ötrü həmin şəxsin giriş-çıxışı üçün ödəniş almaq sadəcə olaraq vicdansızlıqdır. Bu pula görə bütün insanlığı, qayda-qanunları çeynəməkdir. Bulvar İdarəsi biabırçı bir yanaşma nümayiş etdirir. Lap əgər belədirsə, bu qədər məbləğ  yığılırsa  bu pullar hara gedir. Yağışlı havada  gəzmək olmur. Bütün döşəmələrin altı gölə çevrilir. Ayağını daşın üstünə qoyanda  hər tərəfə su sıçrayır”.   

Ekspertin sözlərinə görə keçmiş Dənizkənarı Bulvar İdarəsinin rəhbərliyi orada bir daş sınanda bütün heyət tökülüb təmir işləri aparırdı.  

“İndikilər ancaq pul yığmaqla məşğuldurlar. Bu özbaşınalıqdır, qanunlara qarşı  hayqırıdır. Ölkədə qayda-qanun varsa  15 dəqiqəlik  ödənişsiz müddət hər kəsə aiddir”.  

Dövlət Dənizkənarı Bulvar İdarəsinin mətbuat katibi  Könül İmamverdiyeva açıqlamasında bildirib ki,  orada parkinq edənlər 2 manat ödəniş edirlər.  

“Amma taksi sürücülərinin  müştərini düşürməsinə görə bizim əməkdaşlarımız tərəfindən ödənişin alınması məlumatı tamamilə  yanlışdır”.  

Ayan Rzayeva