Son günlər vətəndaşlar metronun fəaliyyətindən narazıdırlar. Sosial şəbəkələrdə narazılıqlarını bildirən metro istifadəçiləri qatarların gecikdiyini bildirir. Belə ki, metropolitenin Avtovağzal istiqamətində hərəkət edən qatarlarda interval 6-8 dəqiqə, bəzənsə 10-12 dəqiqə təşkil edir. Xocəsən istiqamətinə isə iki qatardan biri hərəkət edir. Üstəlik, yeni istifadəyə verilən stansiyada keçidin olmadığını, qatarların isə pis vəziyyətdə olduğunu iddia edirlər.
Yayılan məlumatlarla bağlı Bakı Metropoliteni QSC-nin mətbuat katibi Bəxtiyar Məmmədov Ednews- a bildirib ki, Avtovağzal stansiyası ilə 8 Noyabr stansiyaları arasında qatarlararası interval 6 dəqiqədir:
“Bu istisna hallarda 8 dəqiqə təşkil edir. Xocəsən stansiyasında isə interval 16 dəqiqədir, yəni iki qatardan biri hərəkət edir. Buna görə interval arasında “minik yoxdur” yazılır. Bu da tələbatla bağlıdır. Bu istiqamətlərdə sərnişin sıxlığı müşahidə olunmur. Xocəsən isə yerüstü stansiya olduğuna görə intervallar digər stansiyalarda olduğu kimi tənzimlənmir. Depo ərazisindən keçdiyi üçün sürət həddi nəzərə alınmalıdır”.
Bəxtiyar Məmmədov bildirib ki, məsələ diqqətdə saxlanılır və monitorinqlər aparılır. Tələbat artdıqca intervallarda dəyişiklik ediləcək.
Törə Zeynallı