Ümumdünya Səhiyyə Təşkilatının (ÜST) Baş direktoru Tedros Adhanom Qebreyesus əmindir ki, 2023-cü ildə COVID-19 pandemiyası başa çatacaq və bu xəstəliklə bağlı beynəlxalq fövqəladə vəziyyət rejimi ləğv olunacaq. Ötən gün isə  ABŞ-da COVID-19 pandemiyası səbəbilə üç ildir qüvvədə olan fövqəladə vəziyyət rejimi ləğv edilib.

Bəs, Azərbaycanda qalan qaydalar nə zaman ləğv olunacaq?

Ednews-a danışan deputat Müşfiq Məmmədov bildirib ki, Azərbaycan ilk gündən etibarən Ümumdünya Səhiyyə Təşkilatının tövsiyyələrinə əməl edib.

O, qeyd edib ki, bununla yanaşı ölkəmiz qlobal pandemiya ilə mübarizədə həm bütün dünya dövlətlərinin gördüyü addımlarla yanaşı, həm də qlobal miqyasda da bu mübarizəyə öz tövhəsini verib.

“Azərbaycan Ümumdünya Səhiyyə Təşkilatının tövsiyyələrini zamanında sürət və keyfiyyətlə həyata keçirib.  Ölkəmizin bu addımları beynəlxalq təşkilatlar tərəfindən yüksək qiymətləndirilib. Təbii ki, ölkəmizdə COVİD-19 infeksiyasının yayılmasının qarşısını almaq üçün  bir çox  tədbirlər görülüb. O cümlədən, ölkədaxili atılan tədbirlərlə yanaşı bizdən aslı olmayan səbəblərdən də müəyyən məhdudlaşdırıcı tədbirlər və fövqəladə vəziyyət rejimi tətbiq olunmuşdu. Ancaq biz indi qlobal pandemiya ilə mübarizəyə baxdıq da nə qədər irəlilədiyimizi görə bilərik”. 

Deputat vurğulayıb ki, həm  dünya ölkələrinin pandemiya ilə bağlı vəziyyətlərində, həm də Azərbaycanın epidemoloji vəziyyətində  müəyyən yumşalmalar olub. 

 “Ölkəmizdə vəziyyət stabildir. Məhdudlaşdırılma tədbirlərinin böyük qismi ləğv olunub. Ancaq müəyyən tədbirlər var ki hələ də qalıb. Onlardan da biri digər ölkələrdən virusun infeksiyasının ölkəmizə daxil olmasının qarşısını almaq üçün sərhədlərin  bağlı olmasıdır. Hazırda dünya və ölkəmizdəki vəziyyətin stabilləşdiyini görürük. Artıq hər şey müsbətə doğru gedir.  Təbii ki, digər məhdudlaşdırcı tədbirllərində aradan götürlməsi gözlənilir. Həm ÜST-ün, həm də digər ölkələrdiki vəziyyət onu göstərir ki, pandemiya ilə bağlı bütün məhdudlaşdırıcı tədbirlər ən qısa zamanda aradan qaldırılacaq”.

Aysel Şahmar