İlahiyyatçı Elşad Mirinin Qədr gecəsi ilə bağlı fikirləri sosial şəbəkələrdə gündəmə çevrilib. Onun birmənalı fikirləri şəbəkə istifadəçilərinin qəzəbinə tuş gəlib. İlahiyyatçı bildirib ki, Qədr gecəsi özəl bir ibadətin həyata keçirildiyi və ya hansısa xüsusi duaların oxunduğu şans gecəsi deyil.
“Bu gecə Quranın nazil olunmağa başladığı gecədir. Qədr gecəsi Quranı anlamağa başladığımız gecədir, yəni qədrini bildiyimiz gecədir. O gecə xüsusi olaraq səhərə qədər oyaq qalmalı olduğumuz gecə deyil. Bu gecədə bəzən insanların Quranı açaraq başlarının üstünə qoyduğunun şahidi oluruq, bunun dinlə heç bir əlaqəsi yoxdur”.
E.Mirinin fikirləri ilə bağlı Ednews-a münasibət bildirən ilahiyyatçı Tural İrfan bildirib ki, Qədr gecəsi Quranın bütövlükdə Peyğəmbərin qəlbinə nazil edildiyi gecədir.
“Quran Rəcəb ayında Hira mağarasında hissə-hissə enməyə başlayıb. Qədr gecəsində isə tamamilə Quranın ümumi mahiyyəti Peyğəmbərin qəlbinə yeridilib. Bu gecə insanların müqəddəratının Allah tərəfindən təyin edildiyi nəql olunur. Ona görə də insanlar bu gecədə Allaha ibadət etməlidirlər. Yəni normal namaz qılıb, dua etməli, xeyirxah işlər görməlidirlər. Məsələn, Quranı açıb içindən bir neçə surə oxumalıdırlar. Ancaq İran molla sürüsünün uzun müddət ölkəmizdəki mənfur təbliğatı nəticəsində bir çox bidətlər məscidlərimizə qədər gəlib çıxıb. Bunlardan biri də Quranı başa qoymaqdır. Bu da zəncir vurmaq kimi İslam dinində olmayan bir işdir. Sonradan uydurulan ibadətlərə İslamda bidət deyilir. Peyğəmbərdən hədis var ki, dinə bidət gətirənin yeri cəhənnəmdir. Quran insanlara oxumaq üçün nazil edilib, başa, çiyinə, kürəyə qoyulmaq üçün yox”.
T.İrfan həmçinin qeyd edib ki, Quranı başa qoyanların demək olar hamısının kitabın içindən xəbəri yoxdur. Əgər onlar həqiqətən də o kitabı oxumuş olsaydılar bu işi etməzdilər.
“Quranın ilk ayəsində Allah oxumağı əmr edir. Peyğəmbər zamanında Quran kitab halında deyildi, demək o bu işi etməyib. Səhabələr və imamlar zamanında da Quran kitabları dəriyə yazılır və çox böyük olurdu. Çəkisi 50 kq, 80 kq idi. Bu boyda kitabı da heç kəs başına qoya bilməzdi. Bu ibadət farsların məcusi dinində olub və qədim yəhudilikdən gəlib. Farslar həyatda olduğu kimi, ibadətdə də riyakardırlar. Günahkar olduqları üçün müqəddəratın həll olduğu gecə Quranı başa qoyurlar ki, başqalarına Allah daş yağdırsa daşlar Qurana dəysin. Necə ki, İmam Hüseyni çağırıb sonra da öldürdülər. Onu maraqlarına qalxan etdilər, bu məsələdə də Quranı qalxan edirlər ki, guya Qurana xatir Allah göydən başlarına lənət endirməsin.Ancaq İslamda belə bir ibadət yoxdur. Bu uydurmadır. Ümumiyyətlə kitab oxumaq üçün çap edilir, başa qoymaq üçün yox”.
Sonda ilahiyyatçı vurğulayıb ki, bu cür səhv addımlar və xurafatları ölkəmizdə İran casusları təbliğ edib yaydılar ki, şiələr sünnilərdən fərqlənsinlər.
“Çünki sünni dünyasında belə ibadət yoxdur və edilmir. İran rejiminin agentlərinin bir taktikası da məzhəb nifaqı salmaq idi. Bu da o qəbildəndir. Yəni vəhdəti, birliyi pozmaq üçün, ən azı fərqli görkəm yaratmaq üçün edirlər. Hətta əvvəllər Ramazan bayramını da İran İslam dünyasından fərqli gündə elan edirdi ki, sünnilər ilə eyni günə düşməsin”.
Oğuz