Xəbər verdiyimiz kimi, Tərtər rayonunun Suqovuşan kəndi istiqamətində minalardan təmizlənməmiş ərazidə mina hadisəsi baş verib. Beynəlxalq Avrasiya Mətbuat Fondunun İcma Mina Aksiyası komandasının sürücüsü, 1990-cı il təvəllüdlü Babaşov Xəzər Tarıyel oğlu minaya düşərək xəsarət alıb.
Hadisə ilə bağlı Ednews-a danışan Beynəlxalq Avrasiya Mətbuat Fondunun prezidenti, ANAMA yanında ictimai Şuranın sədri Umud Mirzəyev bildirdi ki, BAMF-ın əməkdaşı Babaşov Xəzər Tarıyel oğlu səhər saat 08:30 radələrində Suqovuşan ərazisində sürücü ehtiyatsızlıq nəticəsində minaya düşüb. Sağ ayağı topuğdan amputasiya edilib. Səhhəti yaxşıdır, amma hamımız üçün bu hadisə ağrılı-acılı məqamdır:
“Bu gün üzücü xəbər aldıq. İnsan sağlam bədəninin bir hissəsini itirir. İstənilən halda əməkdaşımız həyati təhlükə yaşadı. Həkimlərin dəstəyi, köməyi ilə əməliyyat olunub. Həyati təhlükəsi yoxdur, amma sağlamlığı əldən getdi. Həyatı boyu bu acını, ailəsi, yaxınları da yaşayacaq”.
U.Mirzəyevin sözlərinə görə, 30 ildi işğal altında olan Qarabağ torpaqları demək olar başdan-başa minalarla çirkləndirilib.
“Minaların böyük əksəriyyəti Ermənistan və Rusiya istehsalı olan minalardır. Baxmayaraq ki, 2 ildi bizim torpaqlarımız işğaldan azad edilib. Amma heç birimiz belə bir faciədən, acıdan sığortalanmamışıq. BAMF son 20 ildir ki, Mina Təhlükəsi ilə Mübarizə Proqramında fəaliyyət göstərir. İcma Mina Aksiya komandamız, Maarifləndirmə komandalarımız müxtəlif bölgələrdə fəaliyyət göstərirlər. Müəyyən tədqiqat aparan qruplarımız var ki, onlar gecə-gündüz Qarabağ bölgəsində böyük fəlakətdən, vəhşi düşməndən xilas olmaq üçün çabalar göstərir. Mən bütün dünyanın minalarla mübarizə aparan ən qlobal təşkilatlarını son yüzilliklərin dəhşətli qorxusu olan minalarla birgə və operativ mübarizəyə çağırıram”.
U.Mirzəyev mina təhlükəsizliyi sahəsində əhalinin maarifləndirilməsi istiqamətində ciddi işlərin görülməli olduğunu da vurğulayıb:
“Biz tez-tez həmin ərazilərdə yaşayan insanların arasında oluruq. Maarifləndirmə işləri aparırıq. Ancaq əhali arasında maarifləndirmə işlərinin daha çox aparılmasına ehtiyac var”.
Xatırladaq ki, 2020-ci ilin 10 noyabr razılaşması ilə döyüş əməliyyatları dayandırılandan bu günə qədər Ermənistan silahlı qüvvələrinin basdırdıqları minaların partlaması nəticəsində hərbi qulluqçu və mülki şəxs olmaqla ümumilikdə 295 nəfər mina qurbanlarından 51 nəfər həlak olub, 244 nəfər isə müxtəlif dərəcəli bədən xəsarətləri alıb.
Oğuz