Son zamanlar bütün dünyada olduğu kimi Azərbaycanda da qadına qarşı zorakılıq hallarının artdığı müşahidə edilir. Utanc verici statistika günbəgün çoxalır. Zorakılıq dedikdə ağla gələn ilk şey, şübhəsiz ki, fiziki güc istifadəsinə əsaslanan qəddar qüvvədir, amma əslində şiddəti yalnız fiziki ölçüdə azaltmaq mümkün deyil. Kişilərin zorakılığa meylliliyi ümumiyyətlə, bütün cəmiyyətin bir məsələsidir. Çünki dünyada qadınlara qarşı zorakılıq, irqindən asılı olmayaraq din, dil, fərqi olmadan ümumi bir problemdir. 

Qadına şiddət nə zaman bitəcək? Ölkəmizdə bu problemin artmasında səbəb nədir? 

Mövcud vəziyyətlə bağlı “Təmiz Dünya” Qadınlara Yardım İctimai Birliyinin sədri Mehriban Zeynalova Ednews-a açıqlamasında bildirib ki, vəziyyətin aradan qalxması üçün kişilər davamlı pisixoloji yardımlar almalıdır. 

Mehriban xanım həmçinin qeyd edib ki, şiddətin artmasına səbəb insanlarda olan mənəvi keyfiyyətlərin itirilməsi, ətrafda baş verən hər hala güclü emosional reaksiyanın verilməsi, hər kəsin sosial şəbəkələrdə daha çox vaxt keçirərək ailə dəyərlərini, ailə komfortunu arxa plana keçirməsidir:

“Ənənəvi olaraq ailə daxili basqılar, şəxslərin bir-birinə hörmət duymaması bu məsələyə səbəbdir. Ancaq məsələ nə olur olsun qadına əl qaldırmaq, qadına şiddət yol verilməzdir və bu cinayətdir. Zorakılığa meyilli olan şəxslərin bir çoxunun psixologiyasında ciddi travmalar və zədələr olur. O şəxslərlə davamlı praflaktiki tədbirlər görülməlidir. Bu halların qarşısını almaq üçün həm xanımlar, həm də bəylər bir-birilərini yaxşı tanımalı, hər situasiyanı dəyərləndirməlidir. Şiddətin qurbanı olan nə qədər xanımlarımız var. Hansı ki, onlar artıq dünyaya əbədi gözlərini yumub. Qadına şiddətə susmamalıyıq! Bunun üçün mütləq şəkildə məlumatlandırıcı tədbirlər keçirilməli və təbliğ edilməlidir. Mən deyə bilmərəm bu hal dünyada bir də yaşanmayacaq, amma ən az səviyyəyə endirmək bizim əlimizdədir.” 

Kazımlı Rübabə