Xəbər verdiyimiz kimi, Fransanın yeni milli təhsil və gənclərlə iş üzrə naziri Qabriel Attal bildirib ki, məktəblərdə hicabın - bədəni tamamilə örtən və adi paltarın üstündən geyilən müsəlman qadın paltarlarının geyinilməsini qadağan etmək niyyətindədir.

"Respublikada məktəb dünyəvilik kimi möhkəm prinsiplər üzərində qurulub. Dünyəvilik məktəb vasitəsilə özünü azad etməkdir. Sinif otağına girəndə şagirdlərin dinini təkcə onlara baxmaqla müəyyən edə bilməməlisən”, - o bildirib.

Nazir söz verib ki, gələn həftə məktəb rəhbərləri ilə bu qadağanın necə həyata keçiriləcəyini müzakirə edəcək.

Bu barədə Ednews-a münasibət bildirən ilahiyyatçı Rüfət Qarayevin sözlərinə görə, ümumiyyətlə geyim mədəniyyət formasıdır. Biz tarix boyu həm milli və həm də dini dəyərlərimizə sədaqət göstərərək hörmətlə yanaşmışıq:

“Bu gün bizə məxsus olmayan avropa sayağı açıq-saçıq geyimlər bir qrup insanlar tərəfindən geyinilərək müasirlik hesab olunursa əgər, hesab edirəm ki, Allahın əmri olan hicabın xanımlar və qızlar tərəfindən geyinildiyi zaman, geridəqalmışlıq yox əksinə dəyərlərin qorunub saxlanılması kimi hesab etmək olar. Əgər bir cəmiyyətdə milli normativlərə sığmayan geyim formasıyla çıxış edənlər öz geyimlərinə cəmiyyətin hörmətlə yanaşmasını tələb edirlərsə hicablı formada olan xanımların orta və ali məktəblərdə hicab taxmaları tam normal hal və hətta müsbət dəyərləndirilməlidir”.

İlahiyyatçı qeyd etdi ki, orta məktəblərdə dini tədrisə gəldikdə isə dinin doğru və düzgün təbliğ olunması insanlarda yüksək mədəniyyət və əxlaq formalaşdırır ki, bu da qaçınılmazdır: 

“Əgər biz dinin özünü qəbul ediriksə onda nə üçün dini tədrisin əleyhinə olmalıyıq? Din bizi birliyə, vəhdətə, qardaşlığa və sevgiyə səsləndirdiyi halda biz bu dəyərlərin övladlarımıza aşılanmağına nə üçün manə olaq? Əgər bu gün dində deyil, adət və ənələlərdə formalaşmış müxtəlif xurafatlar din kimi cəmiyyətə ixrac olunursa təbii ki, biz də bir mütəxəssis olaraq bunun əleyhinə olmalıyıq. Qaldı ki, dini tədrisə hər yerindən duran bunu tədris edə bilməz. Gərək din tədris edən kadırlar yüksək əxlaqi keyfiyyətlərə, intellektual səviyyəyə, dini və dünyəvi biliklərə sahib olsunlar. Elə bunlarda bizim yox, dinin öz tələbidir”.

Oğuz