Aprelin 3-də Beynəlxalq Mina Xəbərdarlığı və Minatəmizləmə Fəaliyyətinə Yardım Günü münasibətilə ANAMA yanında İctimai Şuranın üzvləri Ağdam rayonu Şıxbabalı kəndi, həmçinin Tərtər rayonunun Suqovuşan qəsəbəsi və Talış kəndində maarifləndirmə tədbirləri keçiriblər. 

“EDnews” xəbər verir ki, işğaldan azad olunmuş ərazilərdə təşkil olunan görüşlərdə ANAMA yanında İctimai Şuranın sədri Umud Mirzəyev, şura üzvləri Hafiz Səfixanov, Rey Qasımov və Hafiz Əzimzadə, həmçinin Beynəlxalq Avrasiya Mətbuat Fondunun (BAMF) İcma Mina Aksiyası komandasının əməliyyat meneceri Şahin Allahverdiyev və PSTM komandasının rəhbəri Ruslan İbrahimbəyli də iştirak ediblər. 

İlk olaraq Ağdam rayonunun Şıxbabalı kəndində Birinci Qarabağ Müharibəsinin ilk qurbanlarından biri olan Bəxtiyar Quliyevin məzarını ziyarət edən yerli sakinlər və digər ziyarətçilər mina təhlükəsi haqqında məlumatlandırılıb və bu təhlükənin təsirlərinin azaldılması istiqamətində ictimai dəstəyin və fərqindəliyin əhəmiyyəti vurğulanıb. Daha sonra Tərtər rayonunun Suqovuşan qəsəbəsində və Talış kəndində "Böyük Qayıdış" proqramı çərçivəsində öz doğma yurdlarına qayıdan sakinlərlə də görüş keçirilib. Hər iki rayonda keçirilən maarifləndirmə tədbirində ümumilikdə 100-dən çox vətəndaş cəlb olunub.

Qeyd edək ki,  ANAMA-nın və BAMF-ın Partlayıcı sursatlarrın təhlükəsinə dair maarifləndirmə (PSTM) üzrə ixtisaslaşmış əməkdaşları post-konflikt zonalarında mütəmadi olaraq maarifləndirmə işlərinə davam edirlər.